Búgin «Azamattarǵa arnalǵan úkimettiń» Túrkistan oblystyq filialynda «Juldyzdyń HQO-daǵy bir kúni» respýblikalyq aktsiiasy ótti. Áigili ázilkesh, «Nysana» teatrynyń eks-akteri, «Erekshe shoý» tele-jobasynyń basshysy Dáneker Orazbai, bokstan álem chempiony, halyqaralyq dárejedegi sport sheberi Dina Islambekova men onyń jeke jattyqtyrýshysy Almas Qýatbekov «Tsifrlyq Qazaqstan» baǵdarlamasy aiasynda elektrondyq qyzmetterdi nasihattady.
Tanymal tulǵalardy kórgen qyzmet alýshylar alǵashynda tańyrqap, tosyrqap qalsa da, keiin ataqty jerlesterine qurmet kórsetip, olardyń keńesterin muqiiat tyńdady. El sportynyń maqtanyshy, keýdesinde altyn medali jarqyraǵan chempion Dina óz jattyqtyrýshysymen birge halyqqa sypaiy jáne sabyrly kúide keńes berip, elektrondyq úkimet portalynyń múmkindikterin túsindirdi. Al shoýmen Dáneker Orazbai azamattarǵa elektrondyq kezek talonyn taratsa, «Shanshar» ázil-syqaq teratrynyń aktery Ǵalymjan Qalybai halyqty «Ózine-ózi qyzmet kórsetý sektoryna» baǵyttap otyrdy.
Ázilderimen áigili bolǵan jigitter búgin ádetten tys resmi kostiýmde, salmaqty túrde halyqqa memlekettik qyzmetterdi úiden shyqpai-aq nemese kóshede kele jatyp-aq uialy telefondary arqyly alýǵa bolatynyn aitty. Ras, keide olar qaljyńdap, azamattardy kúlkige keneltip, kóńilderin kóterýdi de umytpady.
Mundai aktsiia «Azamattarǵa arnalǵan úkimet» memlekettik korporatsiiasynyń barlyq filialdarynda ótip jatyr. «Mine, oblysymyzdyń juldyzdary bizdiń usynysymyzdy birden qabyldap, turǵyndarǵa qyzmet kórsetýge qýana kelisti. Sol úshin de olarǵa alǵysymdy bildirgim keledi. Olardy halyq qurmetteidi jáne elektrondyq qyzmet alý týraly keńesterine qulaq asady degen úmittemin. Elimizdiń bolashaǵy jastar qolynda, sondyqtan biz aktsiiaǵa jas talanttarymyzdy shaqyrdyq», - deidi Túrkistan oblystyq filialy direktorynyń orynbasary Mádi Amanjol.
Halyqqa keńestik qyzmet kórsetken «juldyzdy mamandar» shamaly sharshasa da, HQO-da ótkizgen jumys kúnderine dán riza. «Bul bólimdegi jumys ta bokstaǵydai kúsh-qairatty, temirdei tózimdilik pen únemi damýdy talap etedi eken», - dep oi bólisti chempion qyz Dina Islambekova.
«Azamattarǵa arnalǵan úkimet» memlekettik korporatsiiasynyń Túrkistan oblystyq filialy 2018 jylǵy 1 qazanda quryldy. Qazirgi tańda filial quramyndaǵy 25 front-ofis pen 34 bek-ofisterde eńbektenip jatqan myńnan astam maman halyqqa aptasyna altyn kún tańǵy saǵat 9.00-den keshki 20:00-ge deiin úzilissiz qyzmet kórsetedi.
