Túrkistan oblysy ortalyǵynda Jetisai aýdanynyń mádeni kúnderi ótti, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
«Túrkistan – Túrki áleminiń júregi» atty aýdan-qalalardyń mádeniet kúnderi aiasynda «Kerýen sarai» týristik kesheninde uiymdastyrylǵan «Jer jumaǵy Jetisaidyń – rýhani Túrkistanǵa tartýy» atty merekelik shara kelýshi kórermenge erekshe kóńil-kúi syilady. Munda aýdannyń qolóner jáne qylqalam sheberleriniń, aýyl sharýashylyǵy taýaróndirýshileriniń, «Týǵan jerim, jumaǵym – Jetisaiym!» atty rýhani kitap jáne Jetisai aýdany etnomádeni ortalyqtarynyń «Jetisai – birlik pen tatýlyqtyń mekeni!» atty aýdandaǵy túrli etnos ókilderiniń ulttyq taǵamdarynyń kórmeleri uiymdastyryldy.
Aldymen Jetisai aýdany ákiminiń orynbasary Serik Pirimbekov pen Túrkistan oblystyq mádeniet basqarmasynyń bas mamany Erjigit Sartaev bastaǵan top arnaiy daiyndalǵan kórmeni tamashalady. Sodan soń mádeniet kúnderi aýdan ónerpazdarynyń gala-kontsertine ulasty. Ári qarai tek aýdannyń ǵana emes el maqtanyshyna ainalǵan Bóri Isa, Muhtar Quralov syndy talanttardyń shyǵarmalary oryndalyp, ájeler toby jáne bishiler óner kórsetse, kúmis kómei ánshiler «Túrkistan» dep án shyrqady. Kesh sońynda merekelik otshashý uiymdastyryldy.
Kelesi kúni «Kerýen sarai» týristik kesheninde Balalar jyly» aiasynda Jetisai aýdanynyń adami áleýetti damytý bólimine qarasty mektep oqýshylarynyń «Túrkistan – bolashaq balǵyndardyń qutty mekeni» atty kontserttik baǵdarlamasy ótti. Munda jas daryndar sahnada óz ónerin úlkendermen birge shyńdap, kópshilikti tánti etti. Eske sala keteiik, atalmysh sharalar qala qonaqtary men turǵyndaryna, týristerge mádeni-rýhani demalys syilaýǵa arnalǵan. Sondai-aq bul aýdan-qalalar arasyndaǵy saiys ne baiqaý emes. Aldaǵy apta sońynda Sairam aýdanynyń mádeniet kúnderi keledi dep josparlanyp otyr.
