Búgin Túrkistan oblysy qoǵamdyq damý basqarmasynyń uiymdastyrýymen Qazaqstan Respýblikasynyń Táýelsizdik kúni merekesiniń qarsańynda 1986 jyly ótken jeltoqsan oqiǵasyna qatysýshylarmen kezdesý ótti.
Atalmysh sharaǵa jeltoqsan oqiǵasyna qatysyp, zardap shegip, qýdalanǵan jáne zań aiasynda aqtalǵan Túrkistan oblysynyń birqatar azamattary men oblystyq qoǵamdyq damý basqarmasynyń mamandary qatysty.
Qatysýshylar aldymen Qoja Ahmet Iasaýi kekenesine baryp, babalar rýhyna taǵzym etip, quran baǵyshtady. Arnaiy jiyn barysynda sóz alǵan jeltoqsan qaharmandary S.Ahmetov, M.Bitaeva, T.Djambýrshievter bul jiynnyń urpaq tárbiesi aldyndaǵy mańyzdylyǵyna toqtalyp, aldaǵy ýaqytta mundai oqiǵalardan sabaq ala otyryp, «Jańa Qazaqstan» tujyrymdamasyn birlese atqarýǵa shaqyrdy.
Uiymdastyrý alqasynyń atynan ólsheýsiz erlikteri men qoǵamnyń damýy jolyndaǵy isterine alǵys aitylyp, oblys ákimdiginiń alǵys hattary men syi-siiapattary tabystaldy.
Aita ketsek, búgin Túrkistan oblysy, Arys qalasynda ornalasqan «Máńgilik el» alleiasynda Jeltoqsan qurbandarynyń rýhyna gúl shoqtaryn qoiý rásimi ótken bolatyn. Sharaǵa qala ákimi Gúljan Qurmanbekova, ákim orynbasarlary men bólim basshylary, 1986 jylǵy Jeltoqsan oqiǵasyna qatysýshylar, ardagerler men jastar uiymdarynyń ókilderi jáne qala turǵyndary men qonaqtary qatysty.
Jiynda sol kúnderdiń kýágerleri estelikterimen bólisip, jeltoqsan oqiǵasynyń qurbandaryn eske aldy.
Budan keiin qalalyq mádeniet úiinde balalyq shaǵy saiasi repressiiaǵa, surapyl soǵysqa tuspa-tus kelgen, satiranyń sardary atanǵan qazaq ádebietiniń qairatkeri Sadyqbek Adambekovtyń «Jeltoqsandaǵy qara tún» spektakli qoiyldy.
Táýelsizdikke jol ashqan 1986 jylǵy Jeltoqsan oqiǵasynyń shyndyǵyn kórsetetin qoiylymdy kórermender bir demmen kórip shyqty. Qalalyq mádeniet úiiniń ártisteri spektakldi asa joǵary jaýapkershilikpen oryndap, kórermender qoshemetine bólendi.
Mádeniet úiine jinalǵan jastar men orta býyn ókilderi, tipti ardagerlerge de esten ketpes áser syilaǵany úshin óner ujymyna óz rizashylyqtaryn bildirdi.
