Túrkistan qalasynyń bes bóligine ornatylǵan «Turkistan bike» stantsiialary qaita iske qosyldy. Bul týraly qala ákimdigi málim etti, dep habarlaidy "Ult aqparat".
Qala ákimdiginiń málimetinshe, kelbeti kórkeigen kóne shahardy taza aýada serýendep júrip kóremin degen turǵyndar men qonaqtar karta nemese ID-kodty alýyna bolady. Ámir Temir kóshesi boiyndaǵy politsiia pýnktindegi mekenjai boiynsha bólimsheden satylatyn kartalardyń ailyq abonement quny 500 teńgeni quraidy. Máselen, jarty saǵat serýendeý tegin. Al, 31-60 minýt deiin - 100 teńge jáne 61-120 minýt (2 saǵatqa deiin) - 250 teńge turady. 121-180 minýt (3 saǵatqa deiin) - 500 teńge bolsa, 181 minýttan bastap ár kelesi paidalaný saǵaty - 1000 teńgeni quraidy. Jaldaý aqysy taýsylǵan turǵyndar tez arada arnaiy mamanmen habarlasyp, aqysyn tóleýine nemese toltyryp alýyna bolady. Jalpy, qala boiynsha bes turaqta 80 tirkeý orny men 40 velosiped qoiylǵan. Velobeketter men satý bólimi tamyz aiynan bastap iske qosylǵan.
