Memleket basshysynyń Túrkitildes elderdi biriktiretin arnaiy ekonomikalyq aimaq qurý týraly tapsyrmasy aiasynda Túrkistan qalasynda «TURAN» arnaiy ekonomikalyq aimaǵy qurylmaq. Ol qoldanystaǵy «TURKISTAN» AEA aýmaǵynda qurylatyn bolady.
«TURAN» AEA aýmaǵynda qoldanystaǵy zańnamada shekteý qoiylǵan qyzmet túrlerinen basqa ekonomikalyq qyzmet túrleriniń «óńdeý ónerkásibi» sektsiiasyna jatatyn qyzmettiń barlyq túri qamtylady. Aimaqta halyqaralyq, óńirlik standarttary jáne daýlardy sheshýde britandyq (Arbitraj) quqyqty qoldaný múmkindigi qarastyrylǵan. Túrkistan oblysynyń ákimi Darhan Satybaldy mańyzdy jobanyń júzege asyrý barysyn talqylaý maqsatynda jaýapty sala basshylarynyń basyn qosty.
«Bizdiń basym baǵyttardyń biri – óndiris jáne jumys oryndaryn ashý. Osy baǵytta bar múmkindikti qarastyramyz. Bul rette Túrki memleketterinen de investitsiia tartýdyń mańyzy zor», – dedi óńir basshysy.
Qarasha aiynda Samarqand qalasynda (ÓR) Túrkitildes Memleketter Uiymyna múshe elderdiń Memleket basshylarynyń qatysýymen ótkizilgen Sammitinde «TURAN» AEA qurý týraly Qazaqstan Respýblikasynyń bastamasy barlyq músheler tarapynan qoldaý tapty. Negizgi maqsat – Túrkistan qalasyn jedeldete damytý jáne Túrkistan qalasynyń investitsiialyq áleýetin joǵarylatý. Onyń aýmaǵy 4 gektardy qurap, 6 qosalqy aimaqtan turady. Olar: Tarihi ortalyq, Ákimshilik-iskerlik ortalyq, Greenfield (Oranǵai aýyly), Brownfield ónerkásiptik qosalqy aimaǵy (Kentaý qalasy) jáne Túrkistan qalasy men halyqaralyq áýejai aýmaǵy.
Oblysta 2022-2026 jyldar aralyǵynda júzege asyrylatyn jalpy quny 1,9 trln. teńgege 9596 jańa jumys orynyn quraityn 71 investitsiialyq jobanyń tizbesi qaita ózektendirildi. Onyń ishinde sheteldik kapitaldyń qatysýymen jalpy quny 225,6 mlrd. teńgege 915 jumys ornyn qurýmen 9 joba bar. Jyl sońyna deiin jalpy quny 29,9 mlrd. teńgege 1197 jumys ornyn qurýmen 25 investtsiiialyq jobany júzege asyrý josparlanǵan. Qazirgi ýaqytta jalpy quny 17,7 mlrd. teńgege 1 myńǵa jýyq jumys ornyn ashýmen 18 investitsiialyq joba iske qosyldy. Odan bólek, oblysta óńdeý ónerkásibin damytý úshin jalpy quny 1,4 trln. teńgege 3595 jumys ornyn ashatyn iri investitsiialyq jobalar júzege asyrylýda.
