"Áziret Sultan" memlekettik tarihi-mádeni qoryq-mýzeiiniń uiymdastyrýymen 1 jeltoqsan - Qazaqstan Respýblikasynyń Tuńǵysh Prezidenti kúnine orai "Elbasy - eldiń tiregi" atty mýzei ardagerleri jáne ziialy qaýym ókilderimen kezdesý ótti.
Sharaǵa Túrkistan qalasy aqsaqaldar alqasynyń tóraǵasy J.Áziretbergenov, Elbasynyń kýrstas dosy A.Karimov, ardagerler keńesiniń tóraǵasy J.Qulbaiymbetov, ádebiet synshysy, ǵalym Q.Ergóbek syndy kóptegen ziialy qaýym ókilderi qatysyp, Táýelsiz Qazaqstannyń irgesin qalap, shekarasyn shegelep, bolashaqqa baǵyt-baǵdar bergen Tuńǵysh Prezident Nursultan Ábishuly Nazarbaevtyń túrki jurtynyń ortaq shańyraǵy Túrkistan qalasy úshin de sińirgen eńbegi jóninde oi bólisti.
- "Qazaq eli qalyptasyp, tarihymyz túgendelip, tilimiz ben dinimiz, dilimiz qaita oralsa, qazaq handary men sultandary, bi-bolystary jerlenip, máńgilik damyl tapqan Qoja Ahmet Iasaýi kesenesi men topyraǵy da tórtkúl dúnie aldynda tarihi kelbetin saqtap, isi musylman halqynyń bas igen ortalyǵy qalpyn jandandyrdy. Elbasy Túrkistan óńirine ár kelgen saparynda babalar rýhyna taǵzym etip, tulǵalardyń tamyrly tarihyn kóptegen mańyzdy strategiiasy basym sheshimder aiasynda urpaq balasyna tarihi mura retinde qaldyrǵany belgili. Elbasynyń "Uly dalanyń jeti qyry" maqalasy "Bolashaqqa baǵdar:rýhani jańǵyrý" baǵdarlamasynyń mánin tereńdei asha túsken bir-birimen sabaqtas dúniege ainalǵany qýantty. Endi mýzei salasyn jandandyrý baǵyttarynda da kóptegen airyqsha ister atqarylatyny sózsiz", - dedi "Áziret Sultan" memlekettik tarihi-mádeni qoryq-mýzeiiniń bas redaktory Ábdikerim Manapov.
Kezdesý barysynda Elbasynyń sarabdal saiasaty aiasynda júzege asqan tarihi sheshimderdiń, Túrkistanǵa sapary, kieli shahardyń oblys ortalyǵy ataýy jolyndaǵy mańyzdy qadamdar jóninde pikirler bildirilip, jiynǵa qatysýshy jastarǵa úlgi-ónegeli áńgimeler aityldy.
-"Elbasynyń "Uly dalanyń jeti qyry" maqalasy shyn máninde maqala emes. Ol rýhani qundylyqtar men muralarymyzdyń betin ashyp, tarihi qalpyn tereń uǵynyrýǵa arnalǵan naqty baǵdarlama. Maqala - tatýlyǵy berik túrki jurtynyń uly dalamen ushtasqan tarihyn túgendep, sanaǵa silkinis syilaǵan uly qazynaly bastama. Tulǵalar tizimin tizbektep, uly joldyń tarih paraqtaryn túgendegen jańa bastama kóptegen jaitty aiqyndap berip otyr", - dedi ádebiet synshysy, ǵalym Q.Ergóbek.
Sonymen qatar, shara aiasynda "Áziret Sultan" memlekettik tarihi-mádeni qoryq-mýzeii atynan Túrkistan qalasyndaǵy №1 A.Baitursynov atyndaǵy jalpy orta mekteptiń ata-anasyz jáne áleýmettik az qamtylǵan otbasy balalaryna qystyq aiaq kiim tabystady.
Basqosý barysynda Elbasynyń kýrstas dosy, qalalyq ardagerler keńesiniń múshesi Ásetýlla Karimov, filologiia ǵylymdarynyń doktory, professor Qulbek Ergóbek, Túrkistan qalalyq ózbek etnomádeni ortalyǵynyń tóraǵasy Raiym Qoshqarov jáne mýzeidi damytýǵa eńbegi sińgen birqatar azamattarǵa "Qoryq mýzeige 40 jyl" merekelik medaldary tapsyryldy.
"Áziret Sultan" memlekettik tarihi-mádeni qoryq-mýzeiiniń baspasóz qyzmeti
