Túrkistan oblysynyń ákimi Darhan Satybaldy QR Sybailas jemqorlyqqa qarsy is-qimyl agenttiginiń Túrkistan oblysy boiynsha departamentiniń basshysy Qanat Qojahmetovpen jáne oblystyń birqatar pedagogterimen birge «BilimLand.kz» tsifrlyq bilim berý platformasynyń qoldanylýy men júrgizilýimen tanysty. Ashyqtyqqa beiimdeitin tsifrlyq júie bul salaǵa adam faktory aralaspai, jemqorlyqtyń aldyn alýǵa yqpalyn tigizbek.
Bilim sapasyn arttyrýǵa baǵyttalǵan júiege oqýshylar men muǵalimder tegin qosylmaq. «Bilim Land» jobasynyń jetekshisi Raýan Kenjehanuly bilim berý platformasy týraly tanystyrylym jasap, qoiylǵan suraqtarǵa jaýap berdi. «Robototehnika» pánin platformaǵa engizý, qatań eseptegi qujattardy engizýge qatysty muǵalimderdiń usynystary boiynsha jumystar júrgiziletin boldy. Ashyqtyqtyń bilim salasyn órge súireitinin aitqan ustazdar bilimniń jańa belesterin baǵyndyrýǵa daiyn ekenderin jetkizdi.
BilimLand – bul elektrondyq oqytý boiynsha álem kóshbasshylarynyń aldyńǵy qatarly jetistikteri negizinde jasalǵan tsifrlyq bilim berý platformasy. Onda 37 pən boiynsha 25 myńǵa jýyq astam daiyn tsifrlyq sabaqtar, 100 myńnan astam interaktivti tapsyrmalar jinaǵy bar. 35 myńnan astam beinesabaqtar, 544 myńnan asa aýdio interaktivti tapsyrmalar, 200 myńǵa jýyq test tapsyrmalary jinaqtalǵan. Oqýshynyń sabaqqa qatysýy, tapsyrmalardy oryndaý men úlgerimine monitoring jasalady. Úi jumysyn berý, tekserý men baǵalardy onlain qoiý júiesi, UBT jəne qorytyndy attestattaýǵa daiyndaityn 77 000 test suraǵynyń úlken bazasy jasaqtalǵan.
Sondai-aq kezdesýde bilim mekemelerine engiziletin býhgalteriialyq baǵdarlama tanystyryldy. Pilottyq joba Astana qalasy men Pavlodar, Jambyl oblystarynda engizilgen. Jańa júie bilim salasyndaǵy qarjylandyrýdyń ashyqtyǵyn jáne tiimdiligin baqylaýdy qamtamasyz etpek. Avtomattandyrý arqyly sybailas jemqorlyq táýekelderin aldyn alýǵa jáne qarjyny tiimdi paidalanýdy arttyrýǵa jaǵdai jasaidy.
Túrkistan oblysynda bilim sapasyn arttyrýdyń asa mańyzdylyǵyn alǵa tartqan oblys ákimi Darhan Satybaldy jańa jobalardyń nátije bererine kóz jetkizý kerektigin eskerdi. Asa mańyzdy mindettiń biri – aýyl mektepteriniń sapasyn kóterý ekenin aitty.
«Bilim sapasyn jetildirýde ashyqtyq pen aiqyndyqtyń bolýy – zańdylyq. Zaman talabyna sai barlyq salada ózgerister bolary anyq. Bilim sapasy – basty kórsetkish. Bilim salasyn damytyp, sapasyn arttyrýǵa kúsh salynady. Ol úshin keshendi jumystar qajet. Jańa múmkindikterdi paidalanýǵa bekingen soń ony jan - jaqty qarastyrǵan jón. Sondyqtan bul júieler tolyq zerttelip, taldanǵannan keiin ǵana kezeń - kezeńmen engizýge bolady», – dedi oblys ákimi.
Túrkistan oblysynda 1000-ǵa jýyq mektep bar. Onda 500 myńǵa jýyq bala bilim alady.
