Túrkistan oblysynyń ákimi Ómirzaq Shókeev oblys ortalyǵynda salynyp jatqan halyqaralyq áýejaidyń jáne onda baratyn avtomobil jolynyń qurylysyn tekserdi, dep habarlaidy "Ult aqparat".
Qaladan 16 shaqyrym qashyqtyqta ornalasqan áýejai halyqaralyq standartqa sai jáne zamanaýi qurylys tehnologiiasymen salynýda.
«YDA Group» túrik kompaniiasy salyp jatqan Túrkistan halyqaralyq áýejaiy jyl sońyna deiin paidalanýǵa beriledi dep josparlanǵan. Qazirgi tańda qurylys alańynda investordyń 300-den asa qurylysshysy 102 arnaiy tehnikamen tynymsyz eńbek etýde. Áýejai 900 gektar aýmaqty qamtidy. Onda terminal, ushý-qoný jolaǵy jáne basqa da nysandar salý kózdelgen.
Áýejaiǵa baratyn avtomobil jolynyń jalpy uzyndyǵy – 16,3 shaqyrym. Munda jylyna 3 millionǵa jýyq jolaýshyǵa qyzmet kórsetý qarastyrylyp otyr.
Sala mamandarynyń málimetinshe, týrizm áleýetin arttyrý úshin oblysta arnaiy baǵdarlama ázirlengen. Kóne shaharda 2025 jylǵa deiin týrist sanyn 5 millionǵa jetkizý kózdelip otyr. Osy maqsatta halyqaralyq áýejaidan eki kúnde bir ret Túrkistannan Mekkege tikelei ushaq ashý kózdelgen.
Bul másele byltyr jeltoqsan aiynda ótken Túrkistan oblysynyń Máskeýdegi kúnderi barysynda aityldy. Is-sharaǵa týristik kompaniialar, týrizm salasyndaǵy qoǵamdyq birlestik uiymdary, qaýymdastyqtar men memlekettik uiymdar qatysqan bolatyn.
