Túrkistan qalasynda Túrkistan oblysy kásipkerlik palatasy filialynyń saltanatty ashylý rásimi ótti.
Ashylý saltanatyna QR «Atameken» Ulttyq kásipkerler palatasynyń basqarma tóraǵasy A.Myrzahmetov, Túrkistan oblysy ákiminiń birinshi orynbasary Q.Núkenov, óńirlik keńes tóraǵasy Q.Abasov jáne oblystyń biznes ókilderi qatysty.
Sharada QR «Atameken» Ulttyq kásipkerler palatasynyń basqarma tóraǵasy A.Myrzahmetov, Túrkistan oblysy ákiminiń birinshi orynbasary Q.Núkenov oblystyq kásipkerlik palatasy ǵimaratynyń ashylýymen quttyqtady. Túrkistan oblysy kásipkerler palatasynyń direktory O.Qarjaýov qonaqtardy palata keńsesimen, onda kórsetiletin qyzmet túrlerimen tanystyrdy.
Túrkistan oblysy ákiminiń birinshi orynbasary Q.Núkenovtiń aitýynsha, oblystyq kásipkerler palatasynyń ashylýymen óńirdegi kásipkerlik salasynyń sapaly jáne sandyq ósýi edáýir ulǵaimaq, bul óz kezeginde oblystyń áleýmettik-ekonomikalyq damýyna oń áserin tigizedi. QR «Atameken» Ulttyq kásipkerler palatasynyń basqarma tóraǵasy A.Myrzahmetov is-shara aiasynda óńirlik keńes otyrysyn ótkizip, zamanaýi, yńǵaily jumys keńistigin jáne oblystyń biznesine yńǵaily ornalasýyn baǵalap, Túrkistan oblysy kásipkerler palatasynyń ujymyna sáttilik pen jemisti eńbek tiledi.
Aita keteiik, 2018 jylǵy 5 qazandaǵy QR «Atameken» UKP buiryǵymen Ońtústik Qazaqstan oblysy kásipkerler palatasy Túrkistan oblysy kásipkerler palatasy bolyp qaita ózgertilgen bolatyn. Munda jobalardy súiemeldeý, kásipkerlerdiń quqyǵyn qorǵaý, qarjylai emes qoldaý bólimderi kásipkerlerge qyzmet etedi. Sondai-aq, ózine-ózi qyzmet kórsetý aimaǵy da iske qosylǵan. Buryn keńesshilermen usynatyn qyzmetterdiń kópshiligin onlain rejiminde alýǵa bolady. Kásip úirenemin deýshilerge kásipkerlik negizderin úiretetin biznes mektep te jumys jasaýda.
«Palata Túrkistan oblysy kásipkerlerine úlken qoldaý kórsetedi. Basty maqsatymyz kásipkerlikti damytýǵa jáne qoldaýǵa, kásipkerlerdiń quqyqtary men zańdy múddelerin qorǵaýǵa, Úkimet pen bilik ókilderi arasynda iskerlik kelissózderdi kúsheitýge, normativtik quqyqtyq aktilerdi ázirleý protsesinde kásipkerlerdi tartýǵa baǵyttalǵan», - dep atap ótti Túrkistan oblysy kásipkerler palatasynyń direktory Oljas Qarjaýov.
Qýanysh Tasybaev
