Qazaqstannyń Tuńǵysh Prezidenti Nursultan Nazarbaevqa Túrkistanda eskertkish ornatý týraly usynys aityldy.
Otandyq BAQ-tyń habarlaýynsha, bul bastamany TÚRIKSOI-dyń Bas hatshysy Bilal Chakydji «Túrkistan – Túrki áleminiń rýhani astanasy: áriptestik integratsiiasy men keleshegi» atty halyqaralyq onlain-konferentsiiada kóterdi.
Konferentsiianyń moderatory H.A. Iasaýi atyndaǵy Halyqaralyq qazaq-túrik ýniversitetiniń vitse-prezidenti Jengiz Tomar bolǵan.
«Qazaqstannyń Tuńǵysh Prezidenti túrki elderiniń tutastyǵynyń nyǵaiýy men damýyna úlken úles qosty. Osydan úsh jyl buryn Nursultan Ábishulynyń tarihi Jarlyǵymen Túrkistan oblysy quryldy, Túrkistan qalasy oblys ortalyǵyna ainaldy. Ult kóshbasshysynyń erekshe Jarlyǵy tek qana Qazaqstan úshin emes, sonymen qatar barlyq túrki álemi úshin tarihi oqiǵa boldy. Osy kezden bastap qala erekshe qarqynmen damyp keledi. Úsh jyldyń ishinde Túrkistan tek qana túrki álemine emes, tysqary jerlerde de tanylyp úlgerdi. Ejelgi qala óziniń tarihi sipatyn saqtai otyryp, zamanyna sai dami bastady. Joǵaryda atalǵandarmen bailanysty Túrki áleminiń rýhani astanasy Túrkistannyń ortalyǵynda qalanyń qaita jandanýyna sebep bolǵan, sonymen qatar túrki yqpaldastyǵy ideiasyn júzege asyrýǵa baǵa jetpes úles qosqan Nursultan Ábishuly Nazarbaevqa eskertkish ornatýǵa shaqyramyn. Bul úshin kóptegen negiz bar. Bul oi Memleket basshysy bola otyryp, túrki elderiniń birigýine yqpal etken, qazaq halqynyń gúldenýi men tynyshtyǵyna, onyń táýelsizdigine umtylǵan Túrki áleminiń danyshpan aqsaqalyna degen erekshe qurmetten týyp otyr. Men barlyq sanaly azamattardyń bul bastamany qoldaitynyna senimdimin», - dedi Bilal Chakydji.
Konferentsiia qatysýshylary sheteldik ǵalymnyń usynysyn biraýyzdan qoldaǵan. Sonymen qatar Nazarbaevtyń túrki áleminiń damýyna qosqan erekshe úlesine alǵysyn bildirgen.
Onlain-kezdesýge Túrkitildes memleketter yntymaqtastyǵy keńesiniń (Túrki keńesi) bas hatshysy Baǵdad Ámreev, Túrkitildes elderdiń Parlamenttik Assambleiasynyń bas hatshysy (TúrkPA) Áli Iyldyz, Halyqaralyq túrki akademiiasynyń Prezidenti Darhan Qydyráli, TÚRIKSOI-dyń bas hatshysy Bilal Chakydji, Nur Otan partiiasynyń hatshysy Arman Qyryqbaev, H.A. Iassaýi atyndaǵy Halyqaralyq qazaq-túrik ýniversitetiniń Ókiletti keńesiniń tóraǵasy, doktor, professor Mýhittin Shimshek, Tatarstan Respýblikasynyń eks-prezidenti Mintimer Shaimiev, Bashqurtstan Respýblikasynyń eks-prezidenti Murtaza Rahimov, Qazaqstan Respýblikasy Parlamenti Májilisiniń depýtaty Darhan Myńbai, Nazarbaev Ýniversitetiniń professory Iýlai Shamilogly qatysty.
Aita keteiik, Qazaqstanda halyqaralyq áýejai, ýniversitet, mektepter, sport mekemeleri Nazarbaevtyń atymen atalady. Buǵan qosa, onyń atynda kósheler de bar. Birneshe qalada birinshi prezident saiabaǵy, astanada birinshi prezident kitaphanasy, birinshi prezident murajaiy men Nazarbaev ortalyǵy bar. 2019 jyly eldi otyz jylǵa jýyq basqarǵan Nursultan Nazarbaev otstavkaǵa ketkennen keiin memleket astanasyna onyń aty berildi.
