قازاقستاننىڭ تۇڭعىش پرەزيدەنتٸ نۇرسۇلتان نازارباەۆقا تٷركٸستاندا ەسكەرتكٸش ورناتۋ تۋرالى ۇسىنىس ايتىلدى.
وتاندىق باق-تىڭ حابارلاۋىنشا, بۇل باستامانى تٷرٸكسوي-دىڭ باس حاتشىسى بيلال چاكىدجي «تٷركٸستان – تٷركٸ ەلەمٸنٸڭ رۋحاني استاناسى: ەرٸپتەستٸك ينتەگراتسيياسى مەن كەلەشەگٸ» اتتى حالىقارالىق ونلاين-كونفەرەنتسييادا كٶتەردٸ.
كونفەرەنتسييانىڭ مودەراتورى ح.ا. ياساۋي اتىنداعى حالىقارالىق قازاق-تٷرٸك ۋنيۆەرسيتەتٸنٸڭ ۆيتسە-پرەزيدەنتٸ جەنگيز تومار بولعان.
«قازاقستاننىڭ تۇڭعىش پرەزيدەنتٸ تٷركٸ ەلدەرٸنٸڭ تۇتاستىعىنىڭ نىعايۋى مەن دامۋىنا ٷلكەن ٷلەس قوستى. وسىدان ٷش جىل بۇرىن نۇرسۇلتان ەبٸشۇلىنىڭ تاريحي جارلىعىمەن تٷركٸستان وبلىسى قۇرىلدى, تٷركٸستان قالاسى وبلىس ورتالىعىنا اينالدى. ۇلت كٶشباسشىسىنىڭ ەرەكشە جارلىعى تەك قانا قازاقستان ٷشٸن ەمەس, سونىمەن قاتار بارلىق تٷركٸ ەلەمٸ ٷشٸن تاريحي وقيعا بولدى. وسى كەزدەن باستاپ قالا ەرەكشە قارقىنمەن دامىپ كەلەدٸ. ٷش جىلدىڭ ٸشٸندە تٷركٸستان تەك قانا تٷركٸ ەلەمٸنە ەمەس, تىسقارى جەرلەردە دە تانىلىپ ٷلگەردٸ. ەجەلگٸ قالا ٶزٸنٸڭ تاريحي سيپاتىن ساقتاي وتىرىپ, زامانىنا ساي دامي باستادى. جوعارىدا اتالعاندارمەن بايلانىستى تٷركٸ ەلەمٸنٸڭ رۋحاني استاناسى تٷركٸستاننىڭ ورتالىعىندا قالانىڭ قايتا جاندانۋىنا سەبەپ بولعان, سونىمەن قاتار تٷركٸ ىقپالداستىعى يدەياسىن جٷزەگە اسىرۋعا باعا جەتپەس ٷلەس قوسقان نۇرسۇلتان ەبٸشۇلى نازارباەۆقا ەسكەرتكٸش ورناتۋعا شاقىرامىن. بۇل ٷشٸن كٶپتەگەن نەگٸز بار. بۇل وي مەملەكەت باسشىسى بولا وتىرىپ, تٷركٸ ەلدەرٸنٸڭ بٸرٸگۋٸنە ىقپال ەتكەن, قازاق حالقىنىڭ گٷلدەنۋٸ مەن تىنىشتىعىنا, ونىڭ تەۋەلسٸزدٸگٸنە ۇمتىلعان تٷركٸ ەلەمٸنٸڭ دانىشپان اقساقالىنا دەگەن ەرەكشە قۇرمەتتەن تۋىپ وتىر. مەن بارلىق سانالى ازاماتتاردىڭ بۇل باستامانى قولدايتىنىنا سەنٸمدٸمٸن», - دەدٸ بيلال چاكىدجي.
كونفەرەنتسييا قاتىسۋشىلارى شەتەلدٸك عالىمنىڭ ۇسىنىسىن بٸراۋىزدان قولداعان. سونىمەن قاتار نازارباەۆتىڭ تٷركٸ ەلەمٸنٸڭ دامۋىنا قوسقان ەرەكشە ٷلەسٸنە العىسىن بٸلدٸرگەن.
ونلاين-كەزدەسۋگە تٷركٸتٸلدەس مەملەكەتتەر ىنتىماقتاستىعى كەڭەسٸنٸڭ (تٷركٸ كەڭەسٸ) باس حاتشىسى باعداد ەمرەەۆ, تٷركٸتٸلدەس ەلدەردٸڭ پارلامەنتتٸك اسسامبلەياسىنىڭ باس حاتشىسى (تٷركپا) ەلي يىلدىز, حالىقارالىق تٷركٸ اكادەميياسىنىڭ پرەزيدەنتٸ دارحان قىدىرەلٸ, تٷرٸكسوي-دىڭ باس حاتشىسى بيلال چاكىدجي, Nur Otan پارتيياسىنىڭ حاتشىسى ارمان قىرىقباەۆ, ح.ا. ياسساۋي اتىنداعى حالىقارالىق قازاق-تٷرٸك ۋنيۆەرسيتەتٸنٸڭ ٶكٸلەتتٸ كەڭەسٸنٸڭ تٶراعاسى, دوكتور, پروفەسسور مۋحيتتين شيمشەك, تاتارستان رەسپۋبليكاسىنىڭ ەكس-پرەزيدەنتٸ مينتيمەر شايميەۆ, باشقۇرتستان رەسپۋبليكاسىنىڭ ەكس-پرەزيدەنتٸ مۇرتازا راحيموۆ, قازاقستان رەسپۋبليكاسى پارلامەنتٸ مەجٸلٸسٸنٸڭ دەپۋتاتى دارحان مىڭباي, نازارباەۆ ۋنيۆەرسيتەتٸنٸڭ پروفەسسورى يۋلاي شاميلوگلى قاتىستى.
ايتا كەتەيٸك, قازاقستاندا حالىقارالىق ەۋەجاي, ۋنيۆەرسيتەت, مەكتەپتەر, سپورت مەكەمەلەرٸ نازارباەۆتىڭ اتىمەن اتالادى. بۇعان قوسا, ونىڭ اتىندا كٶشەلەر دە بار. بٸرنەشە قالادا بٸرٸنشٸ پرەزيدەنت ساياباعى, استانادا بٸرٸنشٸ پرەزيدەنت كٸتاپحاناسى, بٸرٸنشٸ پرەزيدەنت مۇراجايى مەن نازارباەۆ ورتالىعى بار. 2019 جىلى ەلدٸ وتىز جىلعا جۋىق باسقارعان نۇرسۇلتان نازارباەۆ وتستاۆكاعا كەتكەننەن كەيٸن مەملەكەت استاناسىنا ونىڭ اتى بەرٸلدٸ.
