Túrkistanda 10 tamyz – Abai kúnine orai «Uly Dala Eli» ortalyǵynyń uiymdastyrýymen birshama aýqymdy shara ótti, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Aldymen «Delfin Egucation» bilim berý ortalyǵynda Túrkistan oblysy mádeniet basqarmasynyń «Uly Dala Eli» ortalyǵyna qarasty, memleket jáne qoǵam qairatkeri N.Ońdasynov atyndaǵy mýzei filialy «Abai murasy – halyq danalyǵy» atty foto kórme uiymdastyrdy. Munda kórmeniń taqyryptyq mazmunyn ashyp, tolyqtyra túsetin Abai ómiri men onyń áýletine qatysty portretter, fotosýretter men kitaptar qoiyldy.
Sodan soń Názir Tórequlov mýzeii qyzmetkerleriniń uiymdastyrýymen Túrkistan qalalyq ortalyq kitaphanasynda «Álem tanyǵan Uly Abai» atty shara ótti. Munda uly jazýshynyń shyǵarmalaryn toptastyrǵan kitap kórmesi bar. Sharaǵa Túrkistan qalasyndaǵy mektep oqýshylary qatysyp, «Álem tanyǵan – Uly Abai» atty beinerolik daiyndaldy. Ortalyq kitaphana men mýzei qyzmetkerleri birlese ótkizgen sharaǵa M.Áýezov atyndaǵy OQMÝ-dyń «Abaitaný» ǵylymi-zertteý ortalyǵynyń jetekshi ǵylymi qyzmetkeri, f.ǵ.k. Maqsat Áliphan, Tilderdi oqytý ortalyǵynyń qazaq tili mamany Áigerim Jumabai, kózi kórmeitin jáne álsiz kóretin arnaiy kitaphananyń kitaphanashysy Erjan Ibragimov qonaq boldy.
Budan keiin «Balaýsa» balalar jazǵy demalys lagerinde jas oqyrmandar arasynda «Abai meniń júregimde» atty aqynnyń óleńderin mánerlep oqý saiysy ótti. Sharanyń maqsaty – Abai óleńderi arqyly oqýshylardyń rýhani bailyǵyn, adamgershilik qasietterin qalyptastyrý. Oqýshylar atalǵan sharaǵa bar ynta-jigerimen qatysty. Qara sózderdiń mánin zerdelegen jalyndy jastar boilaryna erekshe qýat aldy deýge bolady. Saiysta oqýshylar Abai shyǵarmalaryn oqyp, olardy kúndelikti ádetine ainaldyrýǵa sóz berdi. Uiymdastyrýshylar adamgershilikke, birlikke, oqý-bilimge shaqyratyn mundai sharanyń mańyzdylyǵyna toqtala kelip, «Abai shyǵarmalaryn sanamyzǵa toqi otyra, mánin túsinip, janymyzǵa jaqyn tartyp, Uly babamyzdyń nusqaýymen júrsek, keleshegimiz jarqyn, bolashaǵymyz baiandy bolaryna senimimiz mol» dep atap ótti.
Abai kúnine arnalǵan merekelik shara áleýmettik jelige saýalnama júrgizýmen qortyndylandy.
