Túrkistandaǵy №15 mekteptiń muǵalimin ájethana kúzetpegeni úshin ustap áketken qalalyq politsiia bóliminiń bastyǵy qyzmetinen shettetildi, dep habarlaidy "Ult aqparat" oblystyq PD baspasóz qyzmetine silteme jasap.
«13 jeltoqsan kúni Túrkistan qalasyndaǵy orta mektep muǵalimin politsiia bólimine jetkizý faktisi boiynsha Ishki ister ministri Erlan Turǵymbaevtyń buiryǵymen qalalyq politsiia bóliminiń basshylyǵyna qatysty qyzmettik tekserý júrip jatyr. Tergeý kezinde ishki ister organdary qyzmetkerleriniń muǵalimge qatysty is-áreketiniń qanshalyqty zańdylyǵyna baǵa beriledi. Sondai-aq, Túrkistan qalasy ishki ister basqarmasy bastyǵynyń laýazymyn asyra paidalaný faktisiniń bar-joǵy anyqtalady» delingen habarlamada.
Oblystyq politsiia departamenti basshysynyń buiryǵymen Túrkistan qalalyq politsiia basqarmasy bastyǵy Daniiar Meiirhan qyzmettik tekserý aiaqtalǵanǵa deiin qyzmetinen shettetildi.
Eske sala keteiik, Túrkistanda Maǵjan Jumabaev atyndaǵy №15 orta mekteptiń muǵalimi Baqyt Keýkenov «ájethana kúzetpegeni úshin» jazyqty bolǵan edi. 31 jyldyq ótili bar ustazdy qalalyq ishki ister bóliminiń bastyǵy, politsiia podpolkovnigi Daniiar Meiirhan bastaǵan bir top politsei ustap áketken. Mektep direktory K. Ábdiqadyrovanyń jazýynsha, muǵalim aiaq-kiiminen sý ótken soń sony aýystyrý úshin mektep ǵimaratyna kirgen. Alaida politseiler qarsylyq kórsetkenine qaramastan ustazdyń qolyn qaiyryp, bólimshege áketip qalǵan.
Keiin bul jaǵdaidy estigen Bilim jáne ǵylym ministri Ashat Aimaǵambetov muǵalimge arasha tústi.
Búgin mektep muǵalimin «ájethana kúzetpegeni úshin» ustap áketken qalalyq politsiia bóliminiń bastyǵy Daniiar Meiirhan ustazdan keshirim surady.
