Túrkistan oblysynda aýdandyq máslihat depýtatyna qatysty qylmystyq sipattaǵy shaǵym boiynsha politsiia tekserý júrgizip jatyr, dep habarlaidy ult.kz.
Áleýmettik jelide taraǵan aqparatqa sáikes, Báidibek aýdandyq politsiia bólimine Almaty qalasynyń turǵynynan aryz túsken. Aryzda Báidibek aýdanyna Qytaidan kelgen tanystarymen birge barǵan 34 jastaǵy sheteldik áielge qatysty erkinen tys jynystyq sipattaǵy áreket jasalǵany kórsetilgen. Shaǵymda bul iske aýdandyq máslihat depýtaty Erǵali Amanbaevtyń qatysy bary aitylǵan.
Atalǵan jaǵdaiǵa bailanysty Túrkistan oblysy politsiia departamenti resmi málimdeme jasady.
«Osy derek boiynsha sotqa deiingi tergeý amaldary júrgizilip jatyr. Kúdikti retinde Shymkent qalasynyń turǵyny anyqtalyp, qamaýǵa alyndy», – dep habarlady politsiia ókilderi.
Quqyq qorǵaý organdary qazir oqiǵanyń barlyq mán-jaiyn anyqtap jatyr. Tergeý nátijesine qarai zań talaptaryna sáikes protsessýaldyq sheshim qabyldanady.
Politsiia Qylmystyq-protsestik kodekstiń 201-babyna sáikes tergeý barysyna qatysty ózge aqparat jariialanbaitynyn málimdedi.
Aita keteiik, Erǵali Amanbaev buǵan deiin de qoǵam nazarynda bolǵan. 2025 jyly Shymkent qalasynda jol qozǵalysy erejesin óreskel buzǵany úshin sot sheshimimen bir jylǵa kólik júrgizý quqyǵynan aiyrylǵan.
