Túrkistan oblysynda Qoǵamdyq keńestiń kezekti otyrysy ótip, kún tártibinde jeti másele talqylandy. Jiynda oblys ákimi Janseiit Túimebaev baiandama jasap, Túrkistan qalasynyń damýy týraly sóz qozǵady, dep habarlaidy "Ult aqparat".
Aimaq basshysy Túrkistan qalasyna kóship kelgen bir aida qarqyndy jumys júrgizilip jatqanyn atap ótti. Týristik áleýeti joǵary shahardyń damýyna Elbasynyń tikelei nazar aýdaryp, kóńil bólip otyrǵanyn jetkizdi. Máselen, qalaǵa ótken jyly 1 mln 190 myńnan astam týrist pen ziiaratshy kelgen bolsa, aldaǵy ýaqytta olardyń sanyn kóbeitý kózdelip otyr. Alaida, ol úshin qalaǵa jańa áýejai, temir jol vokzaly men avtovokzal servistik qyzmet kórsetetin áleýmettik-mádeni nysandar salý qajet.
«Tashkent-Túrkistan-Tashkent baǵytynda qatynaityn júrdek poiyz, Tashkent-Túrkistan-Tashkent baǵytynda avtobýs marshrýtyn ashý boiynsha aldyn ala Ózbekstan tarapymen kelisilip, QR Investitsiia jáne damý ministrligine joldandy. Qajetti jobalardyń barlyǵy Keshendi jospar jobasyna engizilip, QR Ulttyq ekonomika ministrligine usynyldy. Túrkistan qalasynda salynatyn jańa nysandar úshin qazandyq pen 3 podstantsiia qurylysyn júrgizýdi josparlap otyrmyz. Sý, gaz máseleleri jedel qolǵa alynady. Turǵyn úi máselesin shuǵyl sheshý úshin jergilikti biýdjet esebinen Túrkistan jáne Kentaý qalalarynda 1956 páterli 33 turǵyn úidiń qurylysy bastalyp ketti. Men oblys kásipkerlerin Túrkistan qalasyna investitsiia salyp, óz jumystaryn júrgizýge taǵy da shaqyramyn. Ákimdik tarapynan qoldaý bolady. Bas jospar qabyldanǵannan keiin Túrkistanda qurylys qarqyn alady», - dedi Janseiit Túimebaev.
Jiynda budan ózge birneshe ózekti máseleler talqylandy. Olardyń qatarynda aty joq 330 kóshege ataý berý jaiy sóz boldy. Sala mamandary keńes múshelerine osy kóshelerge Kúltegin, Qaztýǵan jyraý, Hanqorǵan, Alty Alash, Máńgilik El, Elim-ai, Bolat han, Kúltóbe siiaqty ataýlar beriletinin jetkizdi.
