Búgin Túrkistanda Elbasymyzdyń «Bolashaqqa baǵdar: rýhani jańǵyrý» maqalasy aiasynda jaryq kórgen «Ońtústik Qazaqstan oblysynyń tarihi oryndary men kieli jerleri», «Ońtústiktiń qasietti oryndary: ańyz-ápsanalar» atty qos kitaptyń tusaýkeser rásimi ótti. Aýqymdy sharany Túrkistan oblysy ishki saiasat basqarmasy uiymdastyrdy.
Kitaptyń tusaýkeserine ardagerler, ziialy qaýym ókilderi, oqyrmandar, ǵalymdar men jýrnalister jáne ózge de azamattar qatysty.
Mádeni sharany ashqan Túrkistan oblysynyń ákimi Janseiit Túimebaev «Rýhani jańǵyrý» baǵdarlamasy aiasynda jaryq kórgen týyndylardyń mańyzdylyǵyna toqtalyp, kitaptyń qundylyǵy týraly tilge tiek etti.
«Elbasymyz «Bolashaqqa baǵdar: rýhani jańǵyrý» baǵdarlamalyq maqalasyn júzege asyrý úshin tapsyrma bergen bolatyn. Mine, osyǵan orai «Rýhani jańǵyrý» baǵdarlamasy sheńberinde oblysymyzda 2 qundy kitap jaryq kórip, tusaýy kesilgeli tur. Bul eki kitap oqyrman úshin óte qajet dúnieler. Biz óz tarihymyz ben týǵan ólkemizdiń san ǵasyrdan beri kele jatqan shejiresin bilý arqyly ulttyq bolmysymyzdy, ulttyq kodymyzdy saqtai alamyz. Bul kitaptar rýhani jańǵyrý úshin óte mańyzdy. Qysqasy, mundai kitaptar oqyrmanǵa jetip, rýhani qazynadan árbir azamat sýsyndaýy tiis. Aldaǵy ýaqytta «Rýhani jańǵyrý» baǵdarlamasy men «Uly dalanyń jeti qyry» maqalasyndaǵy tapsyrmalardy oryndaý baǵytyndaǵy jumystar jalǵasyn tabady», – dedi Janseiit Qanseiituly.
Úsh tilde shyǵarylyp otyrǵan «Ońtústik Qazaqstan oblysynyń tarihi oryndary men kieli jerleri» atty kitap-fotoalbomda Túrkistan oblysynyń tarihi oryndary túgel kórsetilgen. Munda kieli oryndar men eskertkishter týraly qazaq, aǵylshyn jáne orys tilderinde málimet berilip, sýrettermen kómkerilgen.
Al, «Ońtústik qasietti oryndary: ańyz-ápsanalar» atty kitabynda Túrkistan oblysyndaǵy áýlie-ámbieler men el aýzyndaǵy tulǵalar týraly ańyzdar men áńgimeler jazylǵan. Bul kitapta kóne zamandardan syr shertetin ápsanalar men qyzyqty derekter mol.
