Túrkistan qalasynda ekonomikalyq sottyń janynan front-ofis ashyldy. «Tsifrlyq Qazaqstan» memlekettik baǵdarlamasy aiasynda qolǵa alynǵan bastamanyń maqsaty - halyqqa sot tóreliginiń ashyqtyǵy men qoljetimdiligin is júzinde qamtamasyz etý, dep habarlaidy "Ult aqparat" oblys ákiminiń baspasóz qyzmetine silteme jasap.
Jumysyn jańa bastaǵan nysannyń ashylý rásimine Túrkistan oblysynyń ákimi Janseiit Túimebaev qatysyp, qyzmet kórsetý ortalyǵyn aralap kórdi.
«Halyqqa qyzmet kórsetetin memlekettik mekemelerdiń sapasyn arttyrý - zaman talaby. Bul týraly Elbasymyz únemi aityp keledi. Mine, búgin osy mindetti oryndaý barysynda halyqqa qyzmet kórsetetin front-ofis ashylyp otyr. Bul - halyq pen bilik arasyn odan saiyn jaqyndastyra túsetin mekeme. Munda máseleniń der kezinde, ádil sheshilýine barlyq jaǵdai jasalǵan. Iaǵni, ortalyqta kórsetiletin qyzmetterdiń basym bóligi elektrondy júiege kóshirilgen. Demek, qoǵamda daý-damai týyndaityn bolsa, burynǵydai uzaq ýaqytqa sozylmai, qysqa merzimde sheshiledi degen sóz», - dedi Janseiit Qanseiituly.
Ǵimaratta aqparattyq ortalyq, kiris keńsesi men ózine-ózi qyzmet kórsetý aimaqtary ornalasqan. Kútý zalynda kelýshilerge jaǵdai jasalǵan, internet jelisi, mobildi symtetikterdi qýattaǵyshtarmen de jabdyqtalǵan.
Sonymen qatar, munda daýlardy sotqa deiin jetkizbei sheshý úshin jumys isteitin mediatsiia kabineti qarastyrylǵan. Onda taraptardyń máselesin ádil sheship, isti toqtatýmen ainalysatyn kásibi mamandar bar.
Odan bólek, keńsede «Virtýaldy sot otyrysy» júiesi jumys isteidi. Bul joba elimizdiń kez-kelgen jerindegi sot otyrystaryna qatysýǵa múmkindik beredi.
