Túrkistan qalasynda QR Mádeniet jáne sport ministrligi janynan Halyqaralyq týrizm jáne meimandostyq ýniversiteti quryldy, dep habarlaidy Ortalyq kommýnikatsiialar qyzmetiniń óńirlik filialy.
Bul oqý ordasy Elbasynyń bastamasy negizinde Memleket basshysynyń tapsyrmasymen ashylyp otyr.
Qazaqstandaǵy halyqaralyq deńgeidegi tuńǵysh ýniversitet týrizm salasyndaǵy álemdik deńgeidegi mamandar daiyndaityn bolady. Týristik biznestiń naqty qajettiligi eskerilgen ýniversitettiń 4 jyldyq bilim berý baǵdarlamasynyń nátijesinde túlekter halyqaralyq úlgidegi eki diplom alady. Bul olardyń álemniń kez-kelgen jerinde óz mamandyǵy boiynsha esh kedergisiz jumys isteýine múmkindik beredi. Onda otandyq jáne sheteldik professorlar, ǵylym doktorlary men týrizm jáne servis salasyndaǵy aldyńǵy qatarly iri kompaniialardyń TOP-menedjerleri dáris oqidy. Sondai-aq, túlekter tájiribesin BUU Halyqaralyq týristik uiymynda (UNWTO) jetildiretin bolady.
Ýniversitet bazasynda biliktilikti arttyrý ortalyǵymen birge IELTS, TOEFL siiaqty halyqaralyq emtihandardy tapsyrý, shet tilderin tereńdetip oqytý úshin til ortalyǵy jumys isteidi. Týrizm fakýltetterinen basqa sporttyq kafedralar da bar.
Túrkistan qalasyndaǵy jańa Halyqaralyq týrizm ýniversiteti biyldan bastap talapkerlerdi qabyldaidy. 2020-2021 jylǵy oqý jylyna 800 grant bólingen. Týrizm mamandyǵyna beiindik páni: geografiia jáne shet tili, al UBT shekti baly: 50. Deneshynyqtyrý jáne sport mamandyǵyna shyǵarmashylyq emtihan, UBT shekti baly 70.
Ýniversitetke qujat qabyldaý aǵymdaǵy jyldyń 20 maýsymy men 7 shilde aralyǵynda júrgiziledi. Shyǵarmashylyq emtihan 8 jáne 13 shilde aralyǵynda ótkiziledi. Qosymsha aqparatty www.tourism-university.kz saitynan bilýge bolady.
