Túrkistandyq balalar Horvatiiaǵa baryp, fýtbol úirenedi, dep habarlaidy «Ult aqparat» oblys ákimdiginiń baspasóz qyzmetine silteme jasap.
Óńirde balalar fýtbolyn damytýǵa kúsh salynbaq. «Turan» fýtbol akademiiasy qurylyp, shetelden bapkerler tartylǵan.
Túrkistan oblysynyń ákimi Darhan Satybaldy Horvatiia Respýblikasynyń Týrizm jáne sport ministrliginiń Memlekettik hatshysy Tonchi Glavina bastap kelgen delegatsiiany qabyldady. Oblys basshysy Katarda ótip jatqan fýtboldan Álem chempionatynda Horvatiianyń jartylai finalyna shyǵýymen quttyqtap, sáttilik tiledi.
Delegatsiia quramynda Horvatiianyń Qazaqstandaǵy Tótenshe jáne Ókiletti Elshisi Refik Shabanovich te boldy.
Kezdesýde oblys basshysy Darhan Satybaldy ekijaqty iskerlik bailanysty odan ári nyǵaitý jaily aitty. Taraptar sport pen týrizm salasyn damytý baǵytyndaǵy jumystardy talqylady. Oblys ákimi tiimdi áleýmettik jobalarmen birlese jumys isteýdi usyndy. Damý jolyndaǵy investitsiialyq múmkindikteriniń molaiǵanyn jáne óńirde óndiristi damytýǵa kúsh salynyp otyrǵanyn atap ótti.
«El Prezidenti Qasym-Jomart Toqaev Túrkistanǵa jumys saparynda Túrkistan qalasyna elimizdiń rýhani – mádeni ortalyǵy mártebesin berý máselesin kóterdi. Túrkistan – Qazaq handyǵynyń astanasy bolǵan uly shahar. Tarihi sheshimder osy qalada qabyldanǵan. Tórt jylda oblys ortalyǵy tanymastai ózgerdi. Oblys qarqyndy damyp keledi. Sport salasyn damytýǵa, onyń ishinde fýtboldy damytýǵa kúsh salynady. Osy arqyly týrizmdi damytýǵa da múmkindik artpaq. Biz Horvatiianyń fýtboldaǵy tabystaryn bilemiz. Búgin Argentinamen kezdesýde quramalaryńyzǵa jeńis pen sáttilik tileimin! Bizdiń jasóspirim fýtbolshylardy daiarlaýda Horvatiia mamandary men fýtbol akademiialarymen birlese jumys atqarýǵa daiynbyz», – dedi oblys ákimi.
Horvatiianyń Qazaqstandaǵy Tótenshe jáne Ókiletti Elshisi Refik Shabanovich fýtboldy damytý baǵytyndaǵy pikirlerin aitty.
«Balany fýtbolǵa erte jastan berý kerek. Segiz-toǵyz jas kesh bolýy múmkin. Horvatiianyń fýtbol akademiialary men mektepteriniń jetistikterin álem biledi. Oǵan bizdiń fýtbolshylardyń jeńisteri dálel. Horvatiiada árbir turǵyn fýtboldyń jankúieri desek qatelespeimin. Sizderde fýtbol damýy úshin jankúierleri kóp bolýy kerek. Balalar fýtbolynan bastaǵan jón. Biz qazaq balalarynyń álemdik arenada jarqyraýyna tilektespiz», – dedi elshi.
Kezdesý sońynda horvatiialyq delegatsiia Túrkistan qalasynyń sáýletine jyly pikirlerin bildirip, Túrkistan oblysynyń ákimi Darhan Satybaldyǵa Horvatiia ulttyq quramasynyń sporttyq formasyn syiǵa tartty.
