Túrkistanda elimizdegi eń iri aýrýhanalardyń biri salynýda. 8 qabatty kópsalaly meditsinalyq ortalyqtyń qurylysy 16 gektar jerdi alyp jatyr, dep habarlaidy "Ult aqparat".
570 tósek-orynǵa shaqtalǵan zamanaýi emdeý kesheni Qazaqstanda josparlanǵan iri jiyrma aýrýhananyń alǵashqysy sanalady. Investitsiialyq jobany Densaýlyq saqtaý ministrligi arqyly memlekettik – jekeshelik áriptestik aiasynda YDA Group túrik investory júzege asyrýda. Nysannyń quny 200 mlrd teńgeden asady. 2019 jyly bastalǵan qurylysty 2022 jylǵa qarai aiaqtaý josparlanýda. Óńirdegi ǵana emes, respýblikadaǵy eń iri meditsinalyq mekemelerdiń biri bolatyn aýrýhananyń jalpy aýdany 80 myń sharshy metrden asady. Álemdik standarttarǵa sai salynyp jatqan aýrýhana tolyq paidalanýǵa berilgennen keiin 2000-nan astam meditsina qyzmetkeri turaqty jumyspen qamtylady. Jobaǵa sáikes, munda 13 beiindi bólimshe men júrek-qan-tamyr jáne koronarlyq reanimatsiia, gematologiia, onyń ishinde kúiikpen emdeýdiń 2 qarqyndy terapiiasy (ICU) bólimsheleri ashylmaq. Budan basqa, kópsalaly aýrýhana qabyrǵalarynda 16 operatsiialyq bólme, onyń ishinde 13 josparly jáne 3 shuǵyl kómek jumys isteitin bolady. Keshende barlyǵy 11 blok bar, olardyń 9-ynda monolitti jumystar júrgizilýde. Nysandy salýǵa 100-den astam qurylysshy jumyldyrylǵan. 4 munara krany men 12 tehnika tartylǵan.
