QR Sybailas jemqorlyqqa qarsy is-qimyl agenttiginiń tóraǵasynyń tapsyrmasyna sáikes Túrkistan oblysy boiynsha Departamentiniń basshysy Hakim Kóshqaliev bastaǵan jedel top Túrkistan qalasynda ornalasqan dárihanalarǵa arnaiy baryp, dárilik zattardyń baǵa turaqtylyǵyna jáne suranysqa ie dári-dármekterdiń jetkizilý deńgeiine zerdeleý jumystaryn júrgizdi, dep habarlaidy "Ult aqparat".
Monitoringtik jumysshy toptyń quramyna Agenttiktiń Túrkistan oblysy boiynsha Departamenti basshysynyń birinshi orynbasary M.Qarǵabai, oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń mamandary, «Túrkistan – adaldyq alańy» jobalyq keńsesiniń menedjerleri men Arnaiy monitoringtik top músheleri, sondai-aq qoǵam belsendileri qatysty. Júieli júrgizilgen zerdeleý jumystary barysynda dárihana uiymdarynda dári-dármekteriniń jetispeýshiligi anyqtaldy. Máselen, «IP Erbulan», «IP Djapaqov» dárihanalarynda suranysqa ie dárilik zattardyń, sonyń ishinde tsef III, paratsetamol, azitromitsin, ingaverin, meropenem, askorbinovaia kislota, tsefamed, deksametazon joq bolyp shyqty.
Sondai-aq, túrkistandyq dárihanalarǵa Almaty qalasynan 136 túrli asa qajetti dári-dárme ákelingendikten, birqatar dárihanalarda naýqas jandarǵa qajetti dári-dármek túrleriniń bar ekendigi de belgili boldy. Dárihanalardaǵy baǵa ósimine monitoring jumystary Kentaý qalasynda da júrgizilip, nátijesinde «Balabieva i K» dárihana uiymynyń dárilik zattardy bekitilgen shektik baǵadan ósirgendigi anyqtaldy. Bul zańbuzýshylyq deregi boiynsha dárihana iesi zań aiasynda ákimshilik jaýapkershilikke tartyldy.
Aita ketsek, Agenttiktiń Túrkistan oblysy boiynsha Departamentiniń bastamasymen ár kún saiyn oblysqa qarasty dárihanalarǵa monitoring jumystary turaqty túrde júrgizilýde.
