QR Prezidenti Qasym-Jomart Toqaev búgin Túrkistan qalasynda ótip jatqan «Múftiler alqasy» men «Islam órkenietiniń damýyna túrki halyqtarynyń qosqan úlesi» halyqaralyq ǵylymi-tájiribelik konferentsiiasyna quttyqtaý hat joldady. Hat mátinin Aqparat jáne qoǵamdyq damý ministri Asqar Omarov oqyp berdi, dep habarlaidy QazAqparat.
«Baýyrlas Ázirbaijan, Qyrǵyzstan, Ózbekstan men Túrkiia elderiniń Bas múftilerine jáne qurmetti qonaqtarǵa zor rizashylyǵymdy bildiremin. Ata dinimiz - Islam meiirimdilik, imandylyq, qanaǵatshyldyq siiaqty asyl qasietterdi dáripteidi. Sondai-aq, beibitshilikti, turaqtylyq pen bereke-birlikti nyǵaitýǵa shaqyrady. Osy oraida, alqaly jiynǵa qatysyp otyrǵan din qairatkerleri jahan jurtyn izgilik jolyna jumyldyrýǵa súbeli úles qosady dep senemin. Búgingi basqosý túbi bir, tarihy ortaq elderimizdiń rýhani-aǵartýshylyq baǵyttaǵy jumystaryna tyń serpin berip, igi bastamalarymyzdyń baiandy bolýyna yqpal etetini sózsiz», - delingen Prezidenttiń quttyqtaý hatynda.
Basqosýda túrki álemindegi kópjaqty qarym-qatynastardyń damýy, túrki memleketteri arasyndaǵy yntymaqtastyqty odan ári tereńdetý jaiy talqylandy.
Jiynda sóz sóilegen oblys ákimi Ómirzaq Shókeev buǵan deiin kieli shaharda Túrkistan deklaratsiiasy qabyldanyp, «Túrkistan – Túrki áleminiń rýhani astanasy» retinde resmi belgilengenin atap ótti. Túrkistannyń aldaǵy ýaqytta da baýyrlas elderge ortaq rýhani astana retinde dami beretindigin jetkizdi.
«Búgingi basqosýǵa Túrkitildes elderdiń bas mýftileri, din salasynda súbeli eńbek etip júrgen ǵulama, ǵalymdary arnaiy qatysyp otyr. Adamzat tarihynyń durys baǵytta órbýinde Islam dininiń alar orny erekshe. Búgingidei almaǵaiyp kezeńderde dini alaýyzdyqqa jol bermei, Islam tarihynyń zerdelenýine eńbek etip júrgen Sizderge degen qurmetimiz erekshe. Túrkistan – qazaq jurtyna ǵana emes, kúlli Túrki baýyrlas elderdi ortaq maqsatqa jumyldyratyn baǵdar bolýy tiis. Osy maqsatta ótip jatqan búgingi jiyn Túrkistannyń ashylmaǵan tarihi qupiialary men tereń tarihyn keńinen tanýǵa, Islam órkenietiniń jandanýyna múmkindik beredi dep senemin», - dedi aimaq basshysy.
