Túrkistan oblysynyń Politsiia departamenti áleýmettik jelide taraǵan kishkentai bala bailaýly otyrǵan videoǵa qatysty túsinik berdi, dep habarlaidy "Ult aqparat".
Áleýmettik jelide kishkentai búldirshin bólmeniń ortasynda bailaýly otyrǵan video tarap jatyr. Kórinisten áiel adamdardyń urys-kerisin, «balany bulaisha qorlaýǵa bola ma?» degen sózderdi estýge bolady. Videony balany kórýge kelgen ákesi túsirgen.
Belgili bolǵandai, erli-zaiyptylar ajyrasyp ketken soń, bala anasymen qalǵan. Al, perzentin kórýge kelgen ákesi burynǵy áieli búldirshinniń aýzyn tumshalap, tipti qimyl-qozǵalysyn shektep tastaǵanyn kóredi.
Oqiǵaǵa bailanysty búgin Túrkistan oblystyq Politsiia departamenti resmi aqparat taratty. Tártip saqshylarynyń sózinshe, bul jaǵdai Saryaǵash aýdanynda bolǵan. Qazir tergeý amaldary júrgizilýde.
«Bul jait biylǵy 8 qańtarda Saryaǵash aýdandyq politsiia bóliminde sotqa deiingi tergep-tekserýdiń biryńǵai tizilimine tirkeldi. Aryzda jergilikti turǵyn azamattyq nekede bolǵan burynǵy áieli 2017 jyly týǵan ulyna qysym kórsetkenine shaǵymdanǵan. Sondai-aq, Saryaǵash APB qyzmetkerleri QR QK-niń 140-baby «Kámeletke tolmaǵan adamdy tárbieleý jónindegi mindetterdi oryndamaý» boiynsha is qozǵady. Tergep-tekserý barysynda oqiǵanyń tolyq mán-jaiy men kináliler anyqtalatyn bolady. Qazirgi tańda sotqa deiingi tergeý amaldary jalǵasýda», - delingen habarlamada.
