Táýelsizdik merekesi qarsańynda Túrkistandaǵy «Farab» ǵylymi-ámbebap kitaphanasynyń kontsert zalynda Túrkistan oblystyq mádeniet jáne halyq shyǵarmashylyǵy ortalyǵynyń uiymdastyrýymen «Bal tańdai» oblystyq balalar óner festivaliniń qorytyndy gala-kontserti ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Saltanatty sharany Túrkistan oblysy mádeniet basqarmasy basshysynyń orynbasary Asylhan Temirhanuly ashyp berip, quttyqtaý sóz sóiledi. Qorytyndy keshte «Balaýsa» úlgili bi ansambliniń «Ónerge qanat qaqqandar» atty bi keshi uiymdastyryldy. Sonymen birge baiqaý jeńimpazdary jáne óńirimizge tanymal estrada juldyzdary óner kórsetti.
Biylǵy «Balalar jylyna» orai daryndy jastardy anyqtaý jáne olarǵa qoldaý kórsetý maqsatyndaǵy atalmysh óner festivali Túrkistan qalasynda jyl boiy ótken bolatyn. Atap aitqanda, buǵan deiin atalmysh festival aiasynda «Kel, bileiik!» bishiler baiqaýy, «Meniń týǵan jerim» jas sýretshiler baiqaýy, «Estradalyq án» baiqaýy, «Babadan qalǵan asyl sóz» atty termeshiler baiqaýy uiymdastyrylǵan.
Jas urpaqtyń boiyna meiirimdilik, qurmet, jaýapkershilik syndy qasietterdi sińirýge baǵyttalǵan «Bal tańdai» balalar óner festivaliniń qorytyndy gala-kontsertinde «Balaýsa» úlgili bi ansambline Alǵys hat pen baǵaly syilyq tabystaldy.
