Túrkistan oblysynyń ortalyǵynda «Til ǵumyry – ult ǵumyry» atty merekelik shara ótti. Ahmet Baitursynulynyń 150 jyldyq mereitoiyna arnalǵan shara eskertkishke gúl shoqtaryn qoiý rásimimen bastaldy. Merekelik shara ármen qarai «Farab» oblystyq ámbebap ǵylymi kitaphanasynda jalǵasty. Ziialy qaýym ókilderi men oblystaǵy etnomádeni birlestikterdiń tóraǵalary, sharaǵa qatysýshy qurmetti qonaqtar arnaiy jasaqtalǵan kórmeni tamashalady. Atalmysh kórme oblysymyzda qyzmet atqaratyn 11 etnomádeni birlestikteriniń tili, mádenieti, salt-dástúrine bailanysty uiymdastyrylǵan.
Saltanatty jiyndy Túrkistan oblysy mádeniet basqarmasynyń basshysy Ázimhan Qoilybaev ashyp berip, quttyqtaý sóz sóiledi. Sondai-aq memlekettik tildiń mańyzdylyǵy men elimizdegi júzege asyrylyp jatqan til saiasatyna, óńirimizde osy baǵytta atqarylyp jatqan jumystarǵa toqtaldy.
«Biyl tilderdi oqytý ortalyqtarynda 3 myńnan asa talapker memlekettik tildi oqýda. Onyń 500-den astamy — ózge etnos ókilderi. Búginde etnomádeni birlestikter janyndaǵy jeksenbilik mektepterde tyńdaýshylar óz ana tilderi men tól mádenietin úirenýde. Olai bolsa, Qazaqstanda turatyn árbir etnos ókiliniń memlekettik tildi bilýge degen umtylysyn arttyrý – bizdiń mindetimiz. Al, qazaq, orys, aǵylshyn tilderin úirenýge yntaly azamattar úshin oblys aýmaǵynda tilderdi tegin oqytatyn 17 ortalyq jumys júrgizýde», – degen basqarma basshysy oblystaǵy til janashyrlary men osy salada eńbegi eleýli azamattarǵa Til komitetiniń Qurmet gramotasy men alǵys hatyn, oblystyq mádeniet basqarmasynyń alǵys hatyn tapsyrdy. Memlekettik tildiń qoldanylý aiasyn keńeitý, árbir etnos ókiliniń memlekettik tildi bilýge degen umtylysyn arttyrý, ult ustazy Ahmet Baitursynulynyń 150 jyldyǵy aiasynda onyń eńbekterin dáripteý, keńinen nasihattaý maqsatynda uiymdastyrylǵan jiyn merekelik kontsertke ulasty. Oblystaǵy óner juldyzdarymen qatar, túrli etnos ókilderi óner kórsetip, qazaq tilinde óleń oqyp, án shyrqady.
Eske sala keteiik, bul mereke Alash arysy, qazaq álipbiiniń negizin salýshy ǵalym, ult ustazy Ahmet Baitursynulynyń týǵan kúnimen bailanysty jyl saiyn atalyp ótiledi.
