Túrkistan qalasynda kópbalaly ana memleketten qaitarymsyz járdemaqy alyp beremin dep 70 adamdy aldaǵan. Tergeý barysynda alaiaq áieldiń qylmysyn burynǵy memlekettik qyzmetkermen birge jasaǵany anyqtalǵan, dep habarlaidy "Ult aqparat".
Oblystyq PD baspasóz qyzmetiniń málimetinshe, alaiaqtardy ustaýǵa jergilikti turǵyndardyń aryzy negiz bolǵan. Ótken jyldyń jeltoqsanynda Túrkistan qalalyq politsiia basqarmasyna bir top jergilikti turǵyndar kelip, memleketten qaitarymsyz járdemaqy alý úshin bir áielge aldanyp qalǵandaryn jetkizgen. Ol úshin tipti suraǵan aqshasyn da berip, bas-aiaǵy 10 mln teńgege shyǵyndalǵanyn aitqan. Osy qylmysty ashý úshin basqarmanyń tájiribeli tergeýshilerinen arnaiy top qurylyp, jurtty taqyrǵa otyrǵyzǵan kúdikti áieldiń Túrkistan qalasynyń turǵyny ekenin anyqtaidy. Sondai-aq tergeý barysynda kópbalaly ananyń sybailasy retinde burynǵy memlekettik qyzmetker ustalǵan. Ekeýine qatysty 70 alaiaqtyq oqiǵasy anyqtalyp otyr. Soǵan qaramastan qazirdiń ózinde osy seziktilerge qatysty politsiiaǵa aryzdanýshylar sany artýda. Búgingi kúnge deiin olardyń taǵy 11 alaiaqtyq jasaǵany anyqtalyp, tergeý amaldary qaita jalǵasýda.
Aita keteiik, kúdikti áiel - 8 balanyń anasy. Tuńǵyshy turmysta bolsa, eń kenjesi - 2 jasar. Qazirgi ýaqytta ol úi qamaǵynda bolsa, memlekettik qyzmetten alastatylǵan er azamatqa qatysty bultartpaý sharasy qoldanylǵan.
«Barlyq faktiler sotqa deiingi tergeýdiń biryńǵai tizilimine tirkeýge alynyp, QR Qylmystyq kodeksiniń 190-baby «Alaiaqtyq» boiynsha is qozǵalǵan. Naqty dálelin tapqan ister sotqa joldandy» delingen habarlamada.
