Foto: Polisia.kz
Túrkistanda kámeletke tolmaǵan 70-ke jýyq balaǵa zańsyz dini sabaq ótkizgen azamat anyqtaldy, – dep habarlaidy "Ult aqparat" Polisia.kz portalyna silteme jasap.
Túrkistan oblysy PD ekstremizmge qarsy is-qimyl basqarmasy men Túrkistan oblysy boiynsha Ulttyq qaýipsizdik komitetiniń qyzmetkerleri birlesip, jedel is-sharalar ótkizý barysynda, kámeletke tolmaǵandarǵa zańsyz dini sabaq bergen er adamdy anyqtaǵan. Naqtyraq, Túrkistan qalasynyń turǵyny úiinde 5 jastan 17 jasqa deiingi 68 balaǵa sabaq berip, dini ýaǵyzdardy zańsyz ótkizgen, al oqý aqysy 100 myń teńgeni quraǵan.
"Kúdiktiniń mekenjaiy boiynsha tekserý júrgizý kezinde 68 bala dini baǵyt boiynsha sabaq alǵany rastaldy. Sondai-aq oqýshylar arasynda Túrkistan ǵana emes, Abai, Shyǵys Qazaqstan, Jambyl oblystary men Ózbekstan Respýblikasynyń balalary da bilim alǵany anyqtaldy.
Oǵan qosa politseiler jergilikti turǵynnyń úiinen saraptamaǵa baǵyttalǵan 100-den astam dini sipattaǵy kitapty tárkiledi.
Er adamǵa qatysty QR ÁQBtK-niń 490-baby 3-bóligi (Qazaqstan Respýblikasynyń dini qyzmet jáne dini birlestikter týraly zańnamasyn buzý) boiynsha ákimshilik hattama toltyryldy" - delingen habarlamada.
Túrkistan oblysynyń politseileri azamattarǵa zańsyz dini qyzmetpen ainalysqany jáne dini ádebietterdi taratqany úshin jaýapkershilik qarastyrylǵanyn eskertedi.
