Túrkistan jurtshylyǵy Almatyda qaza tapqan jas jaýyngerdi aqtyq saparǵa shyǵaryp saldy,-dep habaraidy QazAqparat.
Almaty qalasyndaǵy terroristik shabýylǵa toitarys kezinde QR Ulttyq qaýipsizdik komiteti Shekara qyzmeti akademiiasynyń 2 kýrs kýrsanty Dáýlet Juparbekov qaza tapty. El úshin sheiit bolǵan batyrdyń erligi eskerilip, QR Prezidenti Qasym-Jomart Toqaevtyń Jarlyǵymen III dárejeli «Aibyn» ordeni berildi.
Otan aldyndaǵy boryshyna adal bolyp, el tutastyǵyn saqtaý jolynda erlikpen qaza tapqan jas ulannyń denesi óziniń týǵan jeri – Túrkistan oblysy, Saryaǵash aýdanyna jetkizildi. Túrkistan jurtshylyǵy ony aqtyq saparǵa shyǵaryp saldy.
Halyq qaharmany Baqytjan Ertaev bul qaiǵy bir ǵana otbasy emes, halyqtyń qaiǵysy ekenin jetkizdi. Saryaǵash aýdanynyń ákimi Muhit Otarshiev pen el aǵalary, áskeri sala basshylary men ókilderi, jergilikti turǵyndar marqumnyń otbasyna kóńil aitty.
«Dáýlet – óz eliniń naǵyz patrioty, antyna adal, joldastary arasynda syily, eline áli bereri kóp, bolashaǵynan úlken úmit kúttiretin azamat edi. Orny tolmas aýyr qaiǵylaryńyzǵa ortaqtasyp, shyn júrekten kóńil aitamyn. El úshin eńbek etken batyr uldyń jarqyn beinesi aýdan halqynyń, aǵaiyn-týys, dos-jaran, áriptesteriniń júreginde máńgi saqtalary sózsiz», – dedi aýdan ákimi.
Dáýlet Juparbekov 2002 jyly 1 jeltoqsanda Saryaǵash qalasynda dúniege kelgen. Tolybai batyr atyndaǵy jalpy orta mektebin bitirip, Almaty qalasyndaǵy Ulttyq qaýipsizdik komiteti Shekara qyzmeti akademiiasyna oqýǵa túsken bolatyn. Otbasyndaǵy ekinshi perzent. Marqumnyń qalǵan ata-anasy, ápkesi jáne 2 inisi bar.
