17-18 jeltoqsan kúnderi Túrkistan mýzykalyq drama teatrynda «Mahabbat munarasy» jańa qoiylymy tanystyrylady, dep habarlaidy QazAqparat.
Túrkistan mýzykalyq drama teatrynyń jańa premerasy qysqa ómirinde artyna mol mura qaldyrǵan Talaptan Ahmetjanovtyń «Sulý men sýretshi» shyǵarmasynyń jelisimen sahnalanbaq.
«Bul tek qana ǵashyqtarǵa kórinetin «Mahabbat munarasyna» jeteleitin, minsiz sulýlyqtan týǵan shyǵarma. Munda mahabbat pen ónerdiń serenadasy saltanat qurady. Sulýlyq ataýyn tap-taza, móp-móldir ónerdiń ózeginen izdep, ómir boiy mahabbatyna adal bolǵan jannyń sezimine elitip, qudiretine iip otyryp kóretin qoiylym. Premera «Alash» ádebi syilyǵy men Valentin Pikýl atyndaǵy jáne Oralhan Bókei atyndaǵy syilyqtardyń laýreaty, jazýshy-dramatýrg Talaptan Ahmetjannyń 60 jasqa tolýy premeramen tuspa-tus kelip otyr», - dep habarlady teatrdyń baspasóz qyzmeti.
T. Ahmetjanovtyń bul shyǵarmasy osyǵan deiin birneshe sahnada qoiylǵan, al Túrkistan mýzykalyq drama teatrynda ol zamanaýi kelbetke ie bolmaq. Basty rólderdi Aqbota Rahat pen Juldyz Ábdikárimova, Ádil Ahmetov, Nurqanat Jaqypbaev jáne Túrkistan teatrynyń akterleri oinaidy.
Qoiylymnyń rejisseri – Qazaqstannyń eńbek sińirgen qairatkeri Nurqanat Jaqypbai. Ol osymen úshinshi teatr sahnasynda «Sulý men sýretshini» sahnalaidy. Úsheýi úsh túrli qoiylýymen erekshelenedi. Kórkemdik jetekshisi – Ainur Kópbasarova. Qoiýshy sýretshisi – Qabyl Halyqov. Spektaklge arnaiy mýzyka jazǵan Túrkistan mýzykalyq drama teatry mýzykalyq bóliminiń meńgerýshisi, bas kompozitory Hamit Shanǵaliev. Baletmeister – Madina Muratpekova.
«Bul spektakldiń basty jańalyǵy premerada álemge áigili Amati (Antonius Hieronymus Amati) tarihi aspabymen Shveitsariianyń Tsiýrih qalasynda turatyn talantty mýzykant Eldar Saparaevtyń kelýi. Sahnada 1628 jyly jasalǵan 400 jyldyq tarihy bar violonchelde qoiylymnyń mýzykasy oinalady. 300 jyl Eýropanyń koroldik otbasylarynyń jeke kollektsiiasynda saqtalǵan Amati aspaby qazir murajaiǵa qoiylǵan. Álemde mundai aspaptyń úsheýi ǵana saqtalǵan. Túrkistannyń tórinde oinalatyn Amati tarihi violoncheli – álemniń mádeni murasy», - deidi Túrkistan mýzykalyq drama teatry.
