Oblys ortalyǵy Túrkistan qalasynyń Tashkent shaharymen saýda-ekonomikalyq, týristik qatynastaryn nyǵaitý maqsatynda «Túrkistan-Tashkent» halyqaralyq avtobýs baǵyty ashyldy, dep habarlaidy "Ult aqparat" Túrkistan oblysy ákimdiginiń baspasóz qyzmetine silteme jasap.
Halyqaralyq yntymaqtastyqty nyǵaitýǵa baǵyttalǵan oblys ákimdiginiń usynysy Ministrlikke joldanyp, nátijesinde aǵymdaǵy jyldyń 10 jeltoqsanynda Túrkistan qalasyndaǵy «Altyn Orda» avtobeketinde atalǵan baǵyttyń ashylý rásimi ótti.
Aitýly sharaǵa oblystyq jolaýshylar kóligi jáne avtomobil joldary basqarmasy basshysynyń mindetin atqarýshy M.Myrzabaev, oblystyq týrizm jáne syrtqy bailanystar basqarmasy basshysynyń orynbasary J.Tólebekov, oblystyq máslihat depýtaty B.Musabekov, sondai-aq «Baqdáýlet Servis» JShS-niń direktory N.Qarabaev, «Altyn Orda» avtobeketi direktorynyń mindetin atqarýshy B.Ájekov jáne BAQ ókilderi qatysty.
Atalǵan baǵytqa paritettik negizde Qazaqstandyq tasymaldaýshy «Baqdáýlet Servis» JShS jáne Ózbekstandyq «Ýzavtotrans» OOO mekemesi qyzmet kórsetedi. Aita keterligi, baǵyttyń jalpy qashyqtyǵy - 335 shaqyrym. Jolǵa ketetin ýaqyt - 6 saǵat 40 minýt. Eki baǵytta kúndelikti 2 avtobýs qatynaidy. Túrkistan qalasynan shyǵý ýaqyty («Altyn Orda» avtobeketi) saǵat 07:00 jáne 17:00-de. Al Tashkent qalasynan shyǵý ýaqyty («Tashkent» avtovokzaly) - saǵat 08:00, 18:00 (Astana ýaqytymen). Tehnikalyq aialdama – 30 minýt. Jol júrý tarifi - 2000 teńge nemese 50000 sým.
