Jetisý oblysynda IV aýyl sporty oiyndary óz máresine jetti, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
25 shildeden bastap Taldyqorǵan qalasynda 14 óńirdegi aýyldardan kelgen 3000-ǵa jýyq jas sportshy sporttyń 12 túrinen: shaǵyn fýtbol, voleibol, basketbol (3*3), kógaldaǵy hokkei, qazaq kúresi, asyq atý, toǵyzqumalaq, armrestling, grek-rim kúresi, dziýdo, erkin kúres pen ústel tennisinen synǵa tústi.
Asa tartysty ótken saiystyń qorytyndysy boiynsha túrkistandyqtar mynadai nátijege qol jetkizdi. Jarystyń alǵashqy kúni qol kúresinen jalpykomandalyq birinshi oryndy ielenip, altyn medaldi enshilese, dziýdo kúresinen Túrkistan oblysy balýandary jalpykomandalyń ekinshi oryn ielendi. Basketboldyń 3h3 túrinen uldar arasynda Túrkistan oblysy qurama komandasy jeńimpaz atandy. Bul synda túrkistandyq qyzdar da jeńistiń shyńyn baǵyndyrdy. Qazaqtyń ulttyq sport túri toǵyzqumalaqtan jerlesterimiz kúmispen kúpteldi. Budan ózge Jetisý oblysynda ótken respýblikalyq aýyl sporty jasóspirimder saiysynda asyq atýdan uldar arasynda túrkistandyqtar top jardy. Bes asyq oinaýdan oblystyń qyzdar komandasy tórtikke endi. Al erkin kúres sheberleri de óz myqtylyqtaryn kórsetip, jalpykomandalyq esepte jeńimpaz atandy. Oiyndardyń sońǵy kúni qazaq kúresinen úzdik shyqqan komandalar belgili boldy. Qazaq kúresinen 112 upaimen Túrkistan oblysy top jarsa, Jetisý oblysynyń ókilderi ekinshi, Qaraǵandy oblysynyń sańlaqtary úshinshi orynǵa ie boldy.
Osydan keiin IV aýyl sporty oiyndarynyń qorytyndy upaiyn jariialaý jáne jeńimpazdardy marapattaý rásimine kezek keldi. Qorytyndy esepte 290 upai jinaǵan Jetisý oblysy 1-oryndy ielendi. Al 268 upaiy bar Almaty oblysy 2-oryn alsa, 256 upaimen Túrkistan oblysynyń komandasy úshinshi orynǵa turaqtady.
Dástúr boiynsha tórt jyldan keiin aýyl sporty oiyndaryn qabyldaityn óńir anyqtaldy. Oiyndardyń týyn Jetisý oblysy Aqtóbe oblysyna tapsyrdy.
