Foto: Gov.kz
Balyq sharýashylyǵy óte áleýeti zor sala. Úkimet «Balyq sharýashylyǵyn damytýdyń 2030 jylǵa deiingi baǵdarlamasyn» qabyldady. Baǵdarlama aiasynda respýblika boiynsha 270 myń tonna balyq ósirý jospary bekitilgen bolatyn. Sonyń nátijesinde, Túrkistan oblysy boiynsha 2030 jylǵa deiin 10 jyl ishinde taýarlyq balyq ósirý kólemin 20,0 myń tonnaǵa jetkizý josparlanyp otyr, dep habarlaidy Ult.kz.
Oblysta jergilikti mańyzy bar 104 sý aidyny zańdastyrylǵan. Konkýrstyq negizde 82 sý aidyny, onyń ishinde, 69 sý aidyny kólde taýarly balyq sharýashylyǵyn júrgizý úshin, 13 sý aidyny kásipshilik balyq sharýashylyǵyn júrgizý úshin tabiǵat paidalanýshylarǵa berilgen. 22 sý aidyny rezervte. Qazir óńirde 158 toǵandy balyq ósirý sharýashylyǵy, 5 sharbaqty balyq ósirý sharýashylyǵy, 3 tuiyq qondyrǵymen jabdyqtalǵan balyq ósirý sharýashylyǵy jumys isteidi.
Sý aidyndaryn balyqpen molaitý – basty másele. Búgingi tańda balyq resýrstarynyń ósimin molaitý maqsatynda «Shardara» sý qoimasyna «Hamit» aýyl sharýashylyǵy óndiristik kooperativi 12 gramnan kem emes 635 myń dana shabaq jiberdi. Atap aitsaq, onyń ishinde 300 myń dana tuqy tektes balyq bolsa, 200 dana aq amýr, 135 myń dana dóńmańdai shabaqtary bar. Óńirde balyq sharýashylyǵyn damytý baǵdarlama aiasynda balyq ósirý isi jandanyp keledi. Jyl saiyn memlekettik tapsyrys aiasynda júretin bul jumystar biyl da jalǵasyp, jasandy jolmen ósirilgen balyq dernásilderi sý aidynǵa jiberildi. Jalpy aýdanda balyq sharýashylyǵyn damytý jumystary qarqyndy júrgizilýde.
