Foto: Gov.kz.
Saýran aýdanyna qarasty Oranǵai aýyldyq okrýginde «SOFT HAÝS» tsehynyń ashylý rásimi ótti. Sharaǵa aýdan ákimi Maqsat Tańǵatarov, kásipkerlik jáne týrizm bóliminiń basshysy Sultanǵali Shakirov, Oranǵai aýyldyq okrýginiń ákimi Berik Qýandyq, aýyl aqsaqaldary jáne buqaralyq aqparat quraldarynyń ókilderi qatysty, dep habarlaidy «Ult aqparat».
Jeke kásipker Shavkatjan Iskakov óz qarajaty esebinen osy kásipti bastaǵan. Búginde óndiris ornyn keńeitip, ashylyp otyrǵan tsehtyń aýmaǵy 1,0 gektardy quraidy. Jobanyń jalpy quny – 500 mln. teńge, zamanaýi tehnologiialarmen jabdyqtalǵan tseh jylyna 2 myńǵa jýyq jumsaq jihaz ónimderin shyǵarýǵa qaýqarly.
Búginde 15 azamatty turaqty jumyspen qamtyp otyr. Jumysshylardyń jalaqysy 150-200 myń teńge kóleminde. «SOFT HAÝS» jihazynyń ónimderi búginde suranysqa ie. Qazirgi tańda Qazaqstannyń barlyq aimaqtarymen qatar, kórshiles Qyrǵyzstan eline ótkiziledi. Jihaz jasaýshy óndiristiń áleýeti zor. Negizgi arnaiy jabdyqtardy Qytai, Resei, Túrkiia elderinen aldyrtady. Osylaisha otandyq taýarlar ishki naryqta suranysqa ie bolyp, óziniń ónim kólemin aitarlyqtai arttyryp otyr.
– Jihaz óndirý salasy qarqyndy damyp, kásip jasaimyn degen azamattarǵa memleket tarapynan árdaiym qoldaý taýyp keledi. Otandyq naryqta básekege qabilettilik ósýde. Jyldan jylǵa elimizde turǵyn úi qurylysy qarqyndy júrip jatyr. Bul jihazǵa degen qajettilikti arttyrady. Osylaisha bizdiń ónimder suranysqa ie bolyp, óz kásibimizdiń keńeiýine jol ashylýda, – deidi óndiris ornynyń basshysy Shavkatjan Mamirjanuly.
