Foto:Gov.kz.
Túrkistan oblystyq qoǵamdyq damý basqarmasy «Qoǵamdyq kelisim» KMM-niń uiymdastyrýymen Kentaý qalasy men Saýran aýdanynda BAQ ókilderine arnalǵan baspasóz týry ótti, dep habarlaidy «Ult aqparat».
Sapar aiasynda jýrnalister Jańa Iqan aýyl okrýginde ashylǵan «Ramazan» JK transformatorlardy jóndeý tsehynyń jumysymen tanysty.
Energetikalyq qýatty nyǵaitý – memleketimizdiń ekonomika salasynyń basym bóligi. Onyń ishinde transformator – elektr-tehnikalyq buiymdar rynogynyń eń talapty jáne básekeli bóligi. Kentaý qalasyndaǵy tranformator zaýytynyń ónimderi óńirdiń ǵana emes eldiń mártebesin kóterip, óńir turǵyndaryn ómir sapasyn jaqsartyp jatqany barshaǵa málim.
Osy oraida, Saýran aýdanyndaǵy shaǵyn ǵana aýyldan transformator jóndep, adal eńbegimen otbasyn asyrap otyrǵan Ibata eldi mekeniniń turǵyny, Qazaqstan halqy Assambleiasynyń múshesi, jeke kásipker Mahsud Tajibaev qazirgi tańda 5 adamdy jumyspen qamtyp otyr. Balalarynyń osy salaǵa beiimdiligin baiqap, óziniń bilgenin úiretken ákesi Dadahan Tajibaiuly da kóp jyldar boiy Ibatada elektrik bolyp eńbek etken. Endi balalary Mahsud, Mahmud, Muhammed áke jolymen elektrik bolyp jumys istep, el igiligi úshin aianbai eńbek etýde.
2016 jyly ashylǵan tsehta jumys ónimdiligi men tapsyrysqa qarai aýyl turǵyndary eńbek etip keledi.
Kásiporynda qýatty kerneý diapazonyndaǵy transformatorlardyń qoraby qurastyrylady. Jylyna 60-tan asa transformator qalpyna keltirilip, qaita jasaqtalady. Sonymen qatar kásiporyn jóndeýdi qajet etetin, tozyǵy jetken transformatorlardy jóndeýmen ainalysady. Búginde kásiporyn óz ónimin ózge aýdandar men qalalarǵa shyǵara bastaǵan.
«Aiyna kemi 4-5 tranformator jóndeitin «Ramazan» JK-ne tapsyrys berýshiler kóp. Elimizden bólek, Reseiden de izdep keletinder bar. Olar negizinen Qazaqstan elektr jelileri ortalyǵynyń isten shyqqan tranformatorlarǵa jańa serpin beredi. Ásirese, óndiris oryndary shaǵyn transformatorlarǵa qyzyǵýshylyq tanytady. Zaýyttan áldeqaida arzan ónimderge suranys joǵary» - deidi Mahsud Dadahanuly.
Kásipkerdiń aitýynsha, aýdan ákimi Maqsat Tańǵatarov kásiporyn jumysymen arnaiy tanysyp, kásipkerge qoldaý bildiretinin jetkizgen.
