Foto: Gov.kz.
Túrkistan oblysynyń aýdan, qalalaryn damytý strategiiasyn bekitý jumystary jalǵasýda. Búgin Saryaǵash aýdanyn damytý jospary talqylandy, dep habarlaidy «Ult aqparat».
Óńir basshysy Darhan Satybaldy Saryaǵashtyń áleýeti tolyq qoldanylmai otyrǵanyn aityp, aýdan ákimi men basqarma basshylaryna jumysty júieleýdi tapsyrdy. Basym baǵyttar – óndiris oryndaryn kóbeitý, týrizmdi damytý, aýyl sharýashylyǵynda jańa tehnologiialardy qoldanyp, ónimdilikti arttyrý.
– Izdenis, damý, ózgeris kerek. Izdenbeitin, ózgerýdi qalamaityn adamnyń, basshynyń jetistikke jetýi qiyn. Jan-jaqty zerdelep, tiisti jumys júrgizińizder. Bir zaýyt toqtap qalsa, kórsetkish túsip ketpeýi úshin óndiris oryndaryn kóbeitińizder. Aýdannyń týristik, óndiristik, logistikalyq, tranzittiń múmkindigi joǵary. Aýyl sharýashylyǵyn damytýǵa da qolaily. Júieli jumys qajet, – dedi Darhan Satybaldy.
Saryaǵash aýdanynyń ákimi Arman Abdýllaevtyń aitýynsha, aýdandy damytý jospary jan-jaqty saralanyp, barlyq sala zerdelengen. 2030 jylǵa deiingi damý josparyna sáikes aýdanda 139 jobanyń tizimi jasalǵan. Quny 144,2 mlrd. teńge bolatyn jobalar arqyly 4663 jańa jumys orny ashylmaq. Onyń ishinde ónerkásip salasynda 51, týrizm salasynda 25, aýyl sharýashylyǵynda 31, qurylysta 17, qyzmet kórsetý salasynda 15 joba josparlanǵan. Nátijesinde 2030 jyly aýdannyń jalpy óńirlik ónim kólemi 747,9 mlrd. teńgeni qurap, 2,5 esege artady dep kútilip otyr. Aldaǵy 6 jylda 527,6 mlrd. teńge investitsiia tartylyp, kólemi 2030 jyly 3,8 ese artady dep kózdelgen.
«Saryaǵash» indýstrialdy aimaǵynda jeńil ónerkásip, jihaz óndirisi, kilem, plastmassa jáne rezeńke buiymdaryn óndirý jobalary júzege asady dep josparlanýda.
