Foto: Gov.kz.
Túrkistan oblysynda investitsiia tartý arqyly jańa jumys oryndaryn ashý baǵytynda jumystar jandanyp keledi. Osy baǵytta Ordabasy aýdany «Badam» indýstrialdy aimaǵynda jańa investitsiialyq jobalardyń qurylysy bastalǵan bolatyn, dep habarlaidy «Ult aqparat».
Oblys ákimi Darhan Satybaldy Ordabasy aýdanyna arnaiy issaparmen baryp, aliýminii profil buiymdaryn shyǵaratyn ««Central Asia Aluminum Company» JShS-in aralap, jumys barysyn baqylady. Zaýyttyń qurylysymen tanysqan óńir basshysy kásipkerlermen pikirlesti.
– Bizdiń óńirde jumys oryndaryn ashý mańyzdy. Sol sebepti óńirde iske qosylǵan árbir zaýyt óńir ekonomikasynyń damýyna úles qosady. Sondyqtan investitsiialyq jobalarǵa turaqty qoldaý kórsetiledi. Osy zaýyttarda bizdiń turǵyndar jumys isteidi, – dedi Darhan Satybaldy.
Badam indýstriialdy aimaǵynda «Sentral Asia Aluminum company» kompaniiasynyń aliýminii profil buiymdaryn óndirý zaýytynyń qurylysy júrgizilýde. Jobanyń investitsiialyq quny 4 mlrd. 400 mln.teńge, Jobanyń birinshi kezeńi 2025 jyldyń naýryz aiynda iske qosylyp, 200 jergilikti turǵyndy jumyspen qamtidy. Jyldyq qýattylyǵy – 10 myń tonna. Al ekinshi kezeńi iske qosylǵanda 150 jumys orny ashylmaq.
Issapar aiasynda Badam aýylyndaǵy «RZN» JShS-niń avtoklabtalǵan gazoblok shyǵaratyn zaýytynyń jumysymen tanysty. Jobanyń investitsiialyq quny 1 mlrd. 500 mln. teńgeni. quraidy, al qýatylyǵy jylyna 85 myń tekshe metr. Joba tolyqtai iske asqan kezde 25 adam jumyspen qamtylady. Jer aýmaǵy – 3 gektar.
Óńir basshysyna balalar oiyn alańshalaryn shyǵaratyn zaýyt pen innovatsiialyq temirbeton shyǵarý zaýytynyń, metall ónimderin óndirý jobasynyń qurylys barysy tanystyryldy. Bul kásiporyndarda 100-ge jýyq jumys orny qurylmaq.
Aýdandaǵy zaýyttardy aralap kórgen oblys ákimi memleket tarapynan usynylǵan jer ýaqtyly igerilip, kásiporyndar óz merziminde ashylýy kerek ekenin jetkizdi. Sonymen birge indýstrialdy aimaqty abattandyryp, kógaldandyrý qajettigin, jergilikti turǵyndardy úiretip, jumysqa tartý kerektigin eskertti.
