Belgili memleket qairatkeri, qazaq baspasóziniń saqa menedjeri, QR Parlamenti Májilisiniń depýtaty Saýytbek Abdrahmanov pen túrkologiia tarlany, Qoja Ahmet Iasaýi atyndaǵy halyqaralyq qazaq-túrik ýniversitetiniń professory Qulbek Ergóbek «Túrkistan oblysynyń Qurmetti azamaty» atandy. Túrkistan oblysynyń ákimi Darhan Satybaldy óńirge erekshe úles qosqan azamattardyń sińirgen eńbegin atap ótti. Belgili qoǵam qairatkerlerine halyq atynan alǵys aitty.
«Ulysymyzdyń uiytqysy – Ońtústik óńirinen shyqqan taý tulǵalarmen, ózderińiz sekildi ardaqty aǵalarmen biz árdaiym maqtanamyz. Sizder bilim-ǵylym, jýrnalistika jáne zertteý salalarynda úlken jetistikke qol jetkizdińizder. Elimizdiń órkendeýine, gúldenýine mol úles qostyńyzdar. Kásibi maman retinde ózderińizden keiingi býynnyń qalyptasýyna birińiz qalamger, saiasi qairatker retinde, endi birińiz ǵalym, kórnekti ádebiet synshysy retinde zor eńbek sińirdińizder. Sizderge uzaq ǵumyr, otbasylaryńyzǵa baq-bereke, shyǵarmashylyq tabys tileimin», dedi oblys ákimi.
Saýytbek Abdrahmanov Qazyǵurt aýdanynda ómirge kelgen. Jýrnalistika salasyndaǵy Prezident syilyǵynyń laýreaty, «Qazaqstannyń eńbek sińirgen qairatkeri» qurmetti ataqtary bar. «Parasat» ordenimen, «Birlik» altyn medalimen nagradtalǵan. Birneshe medaldiń iegeri. Halyqaralyq «Alash» ádebi syilyǵynyń laýreaty. Filologiia ǵylymdarynyń doktory. Professor. Qazaqstan Jýrnalistika akademiiasynyń akademigi. Qazaq jáne orys tilderindegi kóptegen kitaptardyń avtory, aýdarmashy.
Ədebietshi, synshy, pýblitsist, filologiia ǵylymynyń doktory, professor, halyqaralyq Sh.Aitmatov akademiiasynyń akademigi Qulbek Ergóbek Otyrar aýdanynda dúniege kelgen. Túrkitaný ǵylymyn damytýǵa, búkil túrki dúniesiniń ortaq qazynasy «Beisenbai Kenjebaiulynyń túriktaný murajaiynyń» negizin qalap, «Túrki tildes halyqtardyń kitaphanasyn» jasaqtaǵan. Professor Q.Ergóbek – «Parasat» ordeniniń iegeri, Halyqaralyq «Alash» ádebi syilyǵynyń laýreaty. Túrkologiia ǵylymynyń maitalman ǵalymdary arasyndaǵy bedeldi tulǵaǵa týǵan jerinde laiyqty qurmet kórsetilip otyr.
