Búgin Qazaqstan Respýblikasy Úkimetiniń selektorlyq rejimdegi otyrysy ótti. Premer - Ministr Baqytjan Saǵyntaevtyń tóraǵalyǵymen ótken jiynda infraqurylymdy damytýdyń 2015 - 2019 jyldarǵa arnalǵan jobasy, «Nurly jol» memlekettik baǵdarlamasynyń iske asyrylý barysy jáne energiia tiimdiligi men energiia únemdeýdi arttyrý jónindegi sharalar týraly máseleler talqylandy.
Jiynda sóz alǵan QR Ulttyq ekonomika birinshi vitse-ministri Rýslan Dálenov «Nurly jol» memlekettik baǵdarlamasyn iske asyrýǵa 792 mlrd. teńge qaralǵanyn málimdedi. 1 qarashaǵa deiin onyń 410,8 mlrd. teńgesi nemese 51,9 paiyzy igerilgen. Nátijesinde kólik infraqurylymdy, energetikalyq infraqurylymdy jáne turǵyn úi – kommýnaldyq sharýashylyq salasyn damytý baǵytyndaǵy birqatar sharýalar atqarylǵan. Máselen, jospar boiynsha 3475 shaqyrymdy quraityn 19 joba iske asyrylyp jatsa, jyl sońyna deiin onyń 426 shaqyrymy paidalanýǵa berilip, 453 shaqyrym jol ashylatyn bolady.
Óz kezeginde Túrkistan oblysynyń ákimi Janseiit Túimebaev óńirdegi kólik infraqurylymynyń jaǵdaiymen tanystyryp, atqarylyp jatqan jumystardy baiandady.
«2018 jyly óńirdegi oblystyq mańyzy bar 161 shaqyrymdy quraityn joldyń qurylys jumysyna respýblikalyq biýdjetten 3,288 mln. teńge qaralǵan. Sondai-aq, «Nurly jol» baǵdarlamasy sheńberinde 2019 jylǵa dep uzyndyǵy 300 shaqyrym bolatyn oblystyq mańyzy bar joldy jóndeýge respýblikalyq qazynadan 7,5 mlrd. teńge bólinip otyr. Osy qarjy tolyǵymen igerilse, keler jyldyń sońyna qarai aimaqtaǵy oblystyq, aýdandyq mańyzy bar joldardyń jaqsy jáne qanaǵattanarlyq jaǵdaidaǵy úlesin 74,1 paiyzǵa ósirýge múmkindik týady», – dedi Janseiit Qanseiituly.
Sondai-aq, basqosýda energiia tiimdiligi jáne ony únemdeýdi arttyrý máselesi de qaraldy. QR Investitsiialar jáne damý ministri Jeńis Qasymbektiń sózinshe, elimizdiń strategiialyq damý jospary jáne jasyl ekonomikaǵa kóshý jónindegi tujyrymdamasy boiynsha 2020 jylǵa qarai jalpy ishki óniminiń energiia siymdylyǵyn kem degende 25 paiyzǵa, 2050 jylǵa qarai 2 esege deiin tómendetý kózdelgen. Búginde respýblikadaǵy energiiany únemdeý sharalarynyń jospary japoniialyq tájiribege súienip jasalýda. Atalǵan salaǵa qatysty aqparatpen qanyqqan Úkimet basshysy oblys basshylaryna osy máselege basa nazar aýdarýdy tapsyrdy. Ásirese, investorlar men energiiany kóp jumsaityn kásiporyndarmen jumysty jandandyrý qajet ekenin eskertti.
