Foto: Polisia.kz
Túrkistan oblysynyń politseileri “Qorǵaý” baǵdarlamasynyń kómegimen tólenbegen 6,6 million teńge bereshegi bar júrgizýshini anyqtady. Bul týraly Túrkistan oblysy PD bastyǵynyń birinshi orynbasary Baǵlanbek Aitpaev brifing kezinde málimdedi, – dep habarlaidy Polisia.kz.
Naqtyraq aitsaq, Túrkistan oblysynyń patrýldik politsiia batalony qyzmetkerleriniń planshetterine “Qorǵaý – qaýipti júrgizýshi” mobildik baǵdarlamasy arqyly tólenbegen aiyppuldary bar Volkswagen Passat avtokóligi týraly aqparat berilgen.
Tártip saqshylary aqparat boiynsha birden iske kirisip, atalǵan kóliktiń júrgen jerin anyqtap, Shymkent – Samara tas jolynda toqtatqan.
Tekserý kezinde bul avtokóliktiń sot oryndaýshysynyń qaýlysyna sáikes, jalpy somasy 6,6 million teńge tólenbegen aiyppuldar boiynsha bereshegi bary anyqtalǵan. Júrgizýshiniń ákimshilik aiyppuldarynyń 80 paiyzy - jyldamdyq rejimin buzýmen bailanysty.
"Tártip saqshylary Volkswagen Passat avtokóligin aiypturaqqa qoiyp, júrgizýshimen bereshekti ýaqytyly tóleý qajettigi týraly túsindirý jumystaryn júrgizdi.
Túrkistan oblysynyń politseileri kólik quraldarynyń júrgizýshilerin jol qozǵalysy erejelerin qatań saqtaýǵa jáne salynǵan ákimshilik aiyppuldardy ýaqytyly tóleýge shaqyrady", – dep atap ótti Túrkistan oblysy PD bastyǵynyń birinshi orynbasary Baǵlanbek Aitpaev.
