Túrkistan oblysynyń meshitterinde kópshilik namaz oqyla bastady. Bul týraly búgin óńirlik kommýnkatsiialar qyzmetinde ótken brifingte óńirdiń bas imamy Musabek Aqtamberdi málimdedi, dep habarlaidy "Ult aqparat".
Bas imamnyń aitýynsha, oblystaǵy 748 meshittiń 632-inde juma namazy oqyla bastaidy. Al, ózge bes ýaqyt namazdar barlyq meshitterde oryndalady. Bas sanitar dárigerdiń qaýlysy boiynsha, jamaǵattan ara qashyqtyqty saqtaý talap etiledi. Syimaǵandar meshit syrtynda qulshylyq jasaidy.
Aita keterligi, meshitter jalpy kópshilikke 2 kezeńmen ashylady. Aldymen aýdan-qala, aýyldyq okrýgterdegi jamaǵaty kóp jinalatyn iri meshitter ashylady. Ekinshiden, barlyq aýyl-aimaqtyń meshitteri jappai jamaǵatty qabyldai alady.
«Karantin jaǵdaiynda meshit qyzmetkerleri men kelýshiler mindetti túrde betperde kiiýi tiis. Barlyq meshitterdiń namaz oqityn, quran oqityn bólmeleri antiseptikalyq quraldarmen qamtamasyz etiledi. Kelýshiler 1,5 metr araqashyqtyqty saqtai otyryp jeke jáne jamaǵat namazdaryn oqidy. Meshit dárethanalary qaýipsizdik maqsatynda karantin rejimi aiaqtalǵansha jabyq turady. Juma ýaǵyzy aitylmaidy. Juma namazynyń qutpasy men namazy 15 minýttan asyrylmaidy», - dedi oblys imamy.
Sonymen qatar, bas imam oblys ortalyǵyndaǵy 30 meshittiń ázirge 17-si ǵana kópshilikke ashylatynyn jetkizdi. Bul meshitterdiń qatarynda «Bekzat», «Quddys», «Aqmeshit», «Naqyp ata», «Igilik», «Tuiaqbai», «Asanbai», «Iassy», «N.Tórequlov» syndy qulshylyq úileri bar.
