Qazaqstanda 2026 jyly uiym basshylarynyń ortasha ailyq jalaqysy 1,1 million teńgeden asty. Al injenerler 702 myń teńge, dárigerler 491 myń teńge shamasynda jalaqy alady. Bul týraly Ulttyq statistika biýrosynyń málimetinde aitylǵan, dep habarlaidy ult.kz.
Biýro 2026 jylǵy sáýirde qyzmetkerlerdiń jalaqy mólsheri boiynsha jyl saiynǵy zertteý júrgizgen. Zertteýge sáýir aiynda tolyq jumys istegen qyzmetkerler qamtylǵan.
Zertteý nátijesi boiynsha uiym basshylarynyń ortasha ailyq eseptelgen jalaqysy 1 101,1 myń teńgeni qurady.
Injenerlik-tehnikalyq mamandar arasynda injenerlerdiń ortasha jalaqysy 702 myń teńge, eńbek qaýipsizdigi jáne eńbekti qorǵaý jónindegi injenerlerdiki 645 myń teńge, injener-tehnologtardiki 617 myń teńge, injener-energetikterdiki 615,1 myń teńge boldy. Al tehnikter orta eseppen 314,7 myń teńge jalaqy alady.
Densaýlyq saqtaý salasynda dárigerlerdiń ortasha ailyq jalaqysy 491,4 myń teńgeni, farmatsevterdiń jalaqysy 347,7 myń teńgeni, feldsherlerdiki 313,6 myń teńgeni, meiirgerlerdiki 264,6 myń teńgeni qurady.
Basqa kásipter boiynsha býhgalterler orta eseppen 398,6 myń teńge, avtomobil júrgizýshileri 328,1 myń teńge, aspazdar 192,6 myń teńge, kúzetshiler 174,2 myń teńge jalaqy alady.
Jalaqy mólsheri qalai ózgerdi?
Ulttyq statistika biýrosynyń málimetinshe, 2026 jyly 300 myń teńgeden joǵary jalaqy alatyn qyzmetkerlerdiń úlesi 58,4%-ǵa jetti. Bul ótken jylmen salystyrǵanda 4,7 paiyzdyq tarmaqqa joǵary.
Al 100 myń teńgege deiin jalaqy alatyn qyzmetkerlerdiń úlesi 3,3%-dan 2,3%-ǵa deiin tómendegen. 100 myńnan 300 myń teńgege deiin jalaqy alatyndardyń úlesi de 43%-dan 39,3%-ǵa azaiǵan.
Jalaqynyń eń joǵary ósimi ónerkásip, qurylys, kólik jáne sabaqtas kásipter jumysshylarynda tirkelgen. Olardyń ortasha jalaqysy bir jylda 13,1%-ǵa ósken. Óndiristik jabdyq operatorlary, qurastyrýshylar men júrgizýshilerdiń jalaqysy 10,4%-ǵa artqan.
Biýro zertteýge sáýir aiynda tolyq jumys istegen qyzmetkerlerdi ǵana qosqan. Eseptelgen jalaqyǵa qosymsha aqylar, ústemeaqylar, syiaqylar, salyqtar men zeinetaqy aýdarymdary kiredi.
