Foto: Túrkistan oblysy ákimdigi
Túrkistan oblysynyń ákimi Nuralhan Kósherov Jetisai aýdanyna baryp, órt saldarynan qaza tapqan azamattardyń otbasyna kóńil aitty dep habarlaidy Ult.kz.
Óńir basshysy oqiǵa bolǵan úidi kórip, jaýapty organdardyń basshylaryna birqatar tapsyrma júktedi.
Ákim aýdandyq aýrýhanaǵa da baryp, tilsiz jaýdan aman qalǵan turǵyndardyń jaǵdaiymen tanysty.
«Jetisai aýdanynyń Alǵabas aýylynda bolǵan aýyr qaiǵyly jaǵdai bárimizdiń janymyzǵa batty. Órt saldarynan adam shyǵyny men jaraqat alǵandar bar. Bul – búkil oblys úshin orny tolmas qasiret», – dedi Nuralhan Kósherov.
Onyń aitýynsha, Memleket basshysynyń tapsyrmasymen úkimettik komissiia qurylyp, qazirgi tańda barlyq quzyrly organ órttiń naqty sebebin anyqtaýǵa kirisken. Tergeý tolyq ári jan-jaqty júrgiziletini aityldy.
Oblys ákimdigi qaza tapqandar men zardap shekkenderdiń otbasyna meditsinalyq, psihologiialyq jáne áleýmettik kómek kórsetip jatyr. Sonymen qatar marqumdardy jerleý rásimin uiymdastyrý tolyqtai baqylaýǵa alynǵany habarlandy.
Aita keteiik, Túrkistan oblysynyń Jetisai aýdanynda oryn alǵan qaiǵyly órt saldarynan 12 adam kóz jumdy.
