Túrkistan oblysynyń ákimi Darhan Satybaldy Sozaq jáne Báidibek aýdandaryna jumys saparymen baryp, turǵyndarmen kezdesti. Sozaq aýdanynda «Belsendi uzaq ómir jáne Teń qoǵam» áleýmettik qyzmetter kórsetý ortalyǵy ashyldy. Onda kúnine 30 múmkindigi shekteýli azamat pen ardagerlerge qyzmet kórsetiledi. Ardagerler men múmkindigi shekteýli jandardyń janyna qajettiniń bári bar. Darhan Satybaldy ortalyq jumysymen tanysyp, ardagerler men múmkindigi shekteýli azamattarmen júzdesti.
«Aǵa býyn qariialarǵa qurmet kórsetý – urpaqqa paryz. Bizdiń qazynaly qarttarymyz densaýlyǵyn túzep, baqytty ómir súrýi tiis. Paidalanýǵa berilgen jańa nysan kópshilik suranysyn qanaǵattandyrady dep senemin», – dedi oblys ákimi.
Sonymen birge oblys ákimi aýdandyq qorǵanys ister bóliminiń jańadan salynǵan ǵimaratynda boldy, birneshe áleýmettik nysandy aralap, jylytý maýsymyna daiyndyǵyn saralady. Naqty tapsyrmalar berdi.
«Táýelsizdik» saiabaǵynda Sozaq turǵyndarynyń aldynda sóz alǵan Túrkistan oblysynyń ákimi Darhan Satybaldy aýdanda atqarylyp jatqan jumystardy salaǵa bólip, túsindirip berdi. Aldaǵy josparlarmen bólisti. Alǵash issaparyn Sozaq aýdanynan bastaǵan oblys ákimi Memleket basshysynyń halyqqa Joldaýynyń el arasynda úlken qoldaýǵa ie bolǵanyn aitty.
«Biz úshin basty mindet – sizderge adal qyzmet etý. Berilgen ýádelerdi oryndaý. Sizderdi tolǵandyryp júrgen áleýmettik jáne basqa da ózekti máselelerdi birge talqylaý úshin kelip turmyz. Bul jerde barlyq basqarma basshylary jáne quqyq qorǵaý organdarynyń birinshi basshylary otyr. 1 qyrkúiek kúni Memleket basshysy Qasym-Jomart Kemeluly Qazaqstan halqyna arnaǵan «Ádiletti memleket. Birtutas ult. Berekeli qoǵam» atty kezekti Joldaýynda Prezident reformalardyń naqty 5 baǵdarlaryn aishyqtap berdi. Olar elimizdiń ekonomikalyq ósimin jedeldetip, halyqtyń ómir súrý sapasy men ál-aýqatyn jaqsartýda mańyzdy ról atqaratyny sózsiz. Jalpy, bárimiz eldiń igiligi úshin qyzmet etýimiz qajet. Osynda berilgen ýádeler oryndalady», – dedi D.Satybaldy.
Jańa formatta ótken halyq aldynda eseptik kezdesýde infraqurylymdyq máseleler basym boldy. Aýyl turǵyndarynyń ótinishteri boiynsha joldar jóndelip, kósheler jaryqtandyrylýda. Kóterilgen barlyq máseleler baqylaýǵa alynyp, oblys basshysy tarapynan tiisti tapsyrmalar berildi.
Kezdesýden keiin oblys ákimi turǵyndardy jeke qabyldap, olardyń kótergen máselelerin tyńdady.
Darhan Satybaldy Báidibek aýdanyna jumys saparynda «Qapshaǵai» sý qoimasyna baryp, jumys barysymen tanysty. Aýdan úshin ǵana emes, oblys úshin mańyzdy strategiialyq nysannyń jóndeý jumystary bastalyp ketken. Jaýaptylarmen, merdigermen kezdesken oblys ákimi sý qoimasynyń qurylysy qoǵam nazarynda turǵanyn jetkizdi.
Odan keiin óńir basshysy Shaian eldi mekenindegi 100000 kitap qoryna arnalǵan ortalyq kitaphana qurylysyn kórdi. Qosymsha qarjylandyrý máselesi kóterildi.
Óńir basshysy Báidibek jurtshylyǵymen kezdesip, usynystary men ótinishterin tyńdady.
«Búgin ózderińizben arnaiy kezdesip turmyn. Maqsat – talaptaryńyz ben usynystaryńyzdy tyńdaý. Biýdjettiń jaǵdaiy belgili. Barynsha tiimdi qoldanyp, birinshi kezekte bastalǵan, qurylysy júrip jatqan jobalardy aiaqtaimyz. Al negizinen halyqqa asa mańyzdy jaryq, jylý, aýyz sý máselelerin sheshýge kúsh salamyz. Árbir ótinish nazarǵa alynyp, tiisti jumys júredi», – dedi Darhan Satybaldy.
Turǵyndar tarapynan óńir basshysyna infraqurylymdy jaqsartý, áleýmettik jaǵdaidy kóterý jáne ózge de máseleler boiynsha suraqtar qoiylyp, jaýaptar berildi. Báidibektikter jańa ákimniń jumysyna sáttilik tilep, el úmitin aqtaitynyna senim bildirdi.
Odan keiin D.Satybaldy bir top turǵyndy jeke qabyldap, ótinishterin tyńdady. Turǵyndar tarapynan kóterilgen árbir másele nazarǵa alynyp, zańǵa sáikes tiisti jumys atqarylady.
Aimaq basshysy shaǵyn biznesti damytý baǵytynda atqarylatyn jumystardy kúsheitý keregin tilge tiek etti. Jergilikti kásipkerlerdiń óz ónimderi men aýyl sharýashylyǵy tehnikalary qoiylǵan kórmeni tamashalap, aýdan kásipkerleriniń qadamyn oń baǵalady.
