Túrkistan oblysynyń ákimi Janseiit Túimebaev elimizdiń kóshbasshy jastarymen beiresmi kezdesý ótkizdi. Basqosýda aimaq basshysy jastardyń oi-pikirin tyńdap, saýaldaryna jaýap berdi, dep habarlaidy "Ult aqparat".
Óńirdegi jastardyń jetken jetistikteri men sheshýdi qajet etetin túiitkilder áńgime arqaýyna ainalǵan basqosýda Janseiit Túimebaev jas býyn ókilderin eldiń damýyna óz úlesin qosyp, belgili-bir ispen ainalysýǵa shaqyrdy. Jasandylyqtan aýlaq júrip, úsh tilde bilim alý qajettigin atap ótti. Óziniń stýdenttik kezin eske alǵan ákim jaqsy ádetterge sol jastyq shaqtan beiim bolý kerektigine toqtaldy. Al, keler jyly Túrkistanda iri kólemdi halyqaralyq is-sharalar ótetinin atap ótti.
«Elbasy Nursultan Nazarbaev halyqqa arnaǵan Joldaýynda 2019 jyldy «Jastar jyly» dep jariialady. Qazirgi tańda Jastar jylyn ótkizý jónindegi el Úkimeti jol kartasyn ázirleýde. Bul jobaǵa Túrkistan qalasynda ótetin iri kólemdi halyqaralyq is-sharalar engizilýde. Máselen, keler jyly Ortalyq Aziia elderi jastarynyń forýmy, Túrkitildes memleketter jastarynyń kongresi uiymdastyrylmaq. Sondai-aq oblystaǵy ár aýdannyń belsendi jastary ai saiyn «Túrkistanǵa tartý» atty shyǵarmashylyq sharalar ótkizilmek», - dedi Janseiit Túimebaev.
Jiynda óńirdiń belsendi jastary men Qyrǵyzstan Respýblikasynan kelgen stýdentter sóz sóilep, zamandastaryna jan-jaqty jaǵdailar jasalyp jatqanyna alǵys bildirdi. Máselen, «Qazaqstannyń 100 jańa esimi» jobasynyń jeńimpazy, Dúniejúzilik toǵyzqumalaq federatsiiasy sportshylarynyń jetekshisi, toǵyzqumalaqtan álemniń 7 dúrkin chempiony Ásel Dálieva jetken jetistikterin jastarǵa kórsetilgen qoldaýmen bailanystyrady.
«Qazirgi tańda óńirimizdiń jastary túrli salalardaǵy baiqaýlar men saiystarda biik belesterdi baǵyndyryp júr. Bul rette, jastarǵa jasalyp jatqan qoldaýdyń mańyzy orasan zor. Búginde jatyqtyrýshynyń da qyzmetin qosa atqarýdamyn. Munyń barlyǵy Sizdiń bizderge degen senimińiz, jas sportshylardyń boiyna artylǵan úlken úmit. Oblys ortalyǵynyń Túrkistan qalasyna aýysýy toǵyz qumalaq sport túriniń odan ary jandanýyna múmkindik beretinin aitqym keledi», - dedi Ásel Dálieva.
Jiynǵa qatysqan jastar, sondai-aq qazirgi tańda ózderin qandai máseleler mazalap otyrǵanyn jetkizdi. Aita keteiik, Túrkistan qalasynda bastalǵan jastar forýmy «Tereń tarihtan - jarqyn bolashaqqa!» atty respýblikalyq pikirsaiys týrnirimen bastaý aldy. Sondai-aq forým qatysýshylary Túrkistan qalasyndaǵy «Qoja Ahmet Iasaýi» kesenesi, Saýran qalashyǵy jáne Otyrar aýdanyndaǵy «Arystan bab» kesenesi, «Rýhaniiat Ábý-Nasyr Ál-Farabi» murajaiy, «Kóne Otyrar tóbe» qalashyǵyn aralap, tarihymen tanysady dep kútilýde. Budan bólek, forým aiasynda jastarǵa arnalǵan «IntellectGAME» ziiatkerlik oiyndary jáne halyqaralyq «Jaidarman» saiysy ótkizilmek. Oǵan Qyrǵystan, Ózbekstan, Bashqurstan, Tatarstan, Túrikmenstan, Túrkiia Respýblikalarynyń qurama komandalary jáne elimizdiń ázilkeshteri qatysady dep josparlanǵan.
