Búgin Túrkistan oblysynyń ákimi Janseiit Túimebaev Frantsiia Ulttyq Assambleiasynyń depýtaty, "Frantsiia-Qazaqstan" dostyq tobynyń tóraǵasy Per Kabare myrza bastap kelgen delegatsiiamen kezdesti.
Quramynda Frantsiianyń Qazaqstandaǵy Tótenshe jáne Ókiletti Elshisi Filipp Martine, Frantsiia Ulttyq Assambleiasynyń Syrtqy ister komitetindegi keńesshisi Jil Aratýn, Frantsiianyń Qazaqstandaǵy Bas konsýly Aleksis Shahtahtinski syndy bedeldi azamattary bar jumys toby óńir basshysymen birge aldymen, oblys ortalyǵynyń keleshektegi damý josparymen tanysyp, odan soń, eki jaqty áńgimede Qazaqstan men Frantsiia memleketteriniń, onyń ishinde, ásirese, Túrkistan oblysymen ekonomikalyq bailanystaryn sóz etti.
"Frantsiia sońǵy 10 jylda qazaqstandyq eksporttyń jalpy kóleminiń 63% - ǵa jýyǵy eksporttalǵan alty eldiń biri bolyp tabylady. Al búgingi tańda Qazaqstanda frantsýz kapitalynyń qatysýymen shamamen 130 kompaniia bar. Onyń ishinde, Túrkistan oblysynda 2 joba júzege asyrylyp jatsa, 3-ýi kelissózder satysynda. Qazaqstandaǵy Frantsýz investitsiiasy sońǵy 10 jyl ishinde 11,5 mlrd. AQSh dollaryn qurady. Bul bizdiń elimizge Frantsiianyń iskerlik qoǵamdastyǵy tarapynan joǵary senimdilikti bildiredi. Sondyqtan, Túrkistan oblysy men Frantsiia Respýblikasynyń arasynda ózara tiimdi óndiristik, saýda-ekonomikalyq jáne investitsiialyq yntymaqtastyqty arttyrý úshin kemel keleshektiń bar ekenine senimdimin", - dedi J.Túimebaev.
Óńirimizde investitsiialyq klimattyń óte qolaily ekenin alǵa tartqan aimaq basshysy biznesti damytyp, ony qoldaýda bizde túrli mehanizmderdiń jumys isteitinin alǵa tartyp, shet eldik kásipkerlerdiń osynda qarjy salyp, is bastaýyna bolatynyn jetkizdi. Sonymen birge, halqy eń tyǵyz ornalasqan óńirlerdiń qataryndaǵy oblysymyzdyń agrarlyq salasyndaǵy múmkindikteri men týrizm salasyndaǵy áleýetiniń joǵary ekenin de aityp ótti.
Óz kezeginde frantsýzdyq meimandar Túrkistandaǵy sońǵy jańalyqtardan habardar ekenin aityp, mundaǵy múmkindiktiń mol ekenine taǵy bir kóz jetkizdi.
"Bul rette frantsýzdyq kompaniialar "Aqyldy qala" syndy ozyq jobalardy usyna alady. Búginge deiin birneshe elderde júzege asyp, sátti júrgizilip kele jatqan 25 jobamyz bar. Bul Túrkistan qalasyna da yńǵaily, 250 myń halyqqa shaqtalǵan. Sondai-aq, shahardy týrizm ortalyǵy retinde damytý úshin júrgizýshisi joq avtonomdy qoǵamdyq kólik qyzmetin de usyna alamyz", - dedi Frantsiianyń Qazaqstandaǵy Tótenshe jáne Ókiletti Elshisi Filipp Martine.
Osynaý usynystarǵa qanyǵyp, ózge de salalardaǵy áriptestik jaiyn sóz etken taraptar joǵaryda atalǵan jobalar boiynsha ákimdik mamandarymen birlese tiimdi tustaryn pysyqtaýǵa ýaǵdalasty.
