Foto: Gov.kz
Túrkistan oblysynyń ákimi Darhan Satybaldy Shensi provintsiiasynan Túrkistanǵa arnaiy kelgen «Chanan» investitsiialyq kompaniialar toby ókilderimen kezdesti, dep habarlaidy «Ult aqparat».
Oblystyq ákimdiktiń baspasóz qyzmetiniń málimetinshe, investitsiialyq kompaniialar tobynyń quramynda sý resýrstaryn basqarý jáne aýyl sharýashylyǵy salasyndaǵy iri kompaniialardyń ókilderi boldy. Mańyzdy kezdesý – oblys ákimi bastaǵan resmi jáne iskerlik delegatsiiasynyń Qytai eline jumys saparynyń jemisi.
Delegatsiia sapary Memleket basshysynyń Qazaqstan halqyna Joldaýyn iske asyrý aiasynda QR Sian qalasyndaǵy Bas konsýldyǵymen birlesip uiymdastyryldy. Kezdesýge Qazaqstan-Qytai kásipkerler qaýymdastyǵynyń ókilderimen birge Sian qalasyndaǵy QR Bas konsýly Joshyhan Qyraýbaev qatysty.
Óz sózinde oblys ákimi Darhan Satybaldy ekijaqty yntymaqtastyqty nyǵaitýdyń mańyzdylyǵyn atap ótip, birlesken jobalardy talqylaýǵa árdaiym daiyn ekenin jetkizdi. Óńirdiń negizgi draiveri sanalatyn aýyl sharýashylyǵy salasy men jańartylatyn energiia kózderi sekildi jobalardyń ózektiligine toqtalǵan óńir basshysy birlesken jobalardy júzege asyrý barysynda ákimshilik taraptan jan-jaqty qoldaý bolatynyn aitty.
– Qasietti Túrkistan tórine qosh keldińizder. Biz óz tarapymyzdan barlyq bastamalarǵa tolyq qoldaý kórsetýge daiynbyz jáne yntymaqtastyǵymyz uzaq merzimge jalǵasady dep úmittenemiz. Men ózim ár investorǵa ózimniń jeke telefon nómirimdi berip, ózim habarlasyp otyramyn. Qazirgi tańda Túrkistan oblysy elimizdiń qarqyndy damyp kele jatqan óńirleriniń biri jáne úlken investitsiialyq sondai-aq týristik áleýetke ie. Óńirimiz arqyly ótetin «Batys Eýropa – Batys Qytai» halyqaralyq kólik dálizi álemdik naryqqa shyǵýdyń jańa múmkindikterin ashady. Memleket basshysy Qasym-Jomart Kemeluly Qytaidyń jahandyq qaýipsizdikti qamtamasyz etý isindegi sheshýshi róline nazar aýdaryp, ony ekonomikalyq jáne tehnologiialyq damýdyń lokomotivi retinde atap ótti. Osy baǵytta jumystarǵa kúsh salynyp, birlesken jobalalar júzege asady degen oidamyz. Yntymaqtastyǵymyz uzaq merzimge jalǵasady dep úmittenemiz, – dedi Darhan Satybaldy.
Shetel delegatsiiasy tarapynan birneshe jobalar usynyldy. Eń aldymen, halyq suranysyna sai salalarǵa basymdyq berilgen. Investorlar jaryqtandyrý, taza aýyz sýdyń qoljetimdiligin arttyrý jáne shóldi aimaqtardy kógaldandyrý jolymen jerdi qalpyna keltirý jobalaryn iske asyrý boiynsha usynystaryn bildirdi. Bas konsýldyq kelissózderdi uiymdastyrýǵa, konsýltatsiialyq qyzmetter kórsetýge jáne taraptardyń ózara is-qimyl protsesin súiemeldeýge qol ushyn sozýǵa daiyn ekenderin jetkizdi.
Sian sý kompaniialarynyń toby aýyz sýdy tazartý tehnologiialaryn investitsiialaýǵa, arnaiy qondyrǵylardy, drenajdyq júielerdi salýǵa jáne basqarýǵa, tuzdy jáne shóldi jerlerdi sýmen qamtamasyz etýge, lastanǵan sý qoimalaryn tazartýǵa jáne óńdeýge mamandanǵan. Kompaniia shoiyn qubyr tóseýmen, sýmen jabdyqtaý jáne káriz júielerin qalpyna keltirýmen, sondai-aq sýdy paidalaný tiimdiligin arttyrýmen ainalysady. Sondai-aq ekologiiasy nashar aýmaqtarda ekojúieni qalpyna keltirý jáne arnaiy ósimdikterdiń tuqymyn ósirý tehnologiiasyn meńgergen álemdik jetekshi óndirýshi kásiporyn. Kompaniia ár jobasynyń tiimdiligin ǵylymi turǵyda dáleldeýmen, topyraqtyń qunaryn jaqsartýmen shuǵyldanady. Eldi mekenderdi kógaldandyryp, ný ormanǵa ainaldyrýǵa mamandanǵan.
Taiaýda ǵana Túrkistan oblysynyń ákimi Darhan Satybaldy bastaǵan resmi jáne iskerlik delegatsiiasy Qytai eline jumys saparymen baryp, bul eldiń birneshe provintsiiasymen baýyrlastyq memorandýmyna qol qoiylǵan bolatyn. Kóptegen jetekshi kásiporyndar men óndiris oryndarynyń jumysymen tanysyp, 20-dan astam kompaniiamen birlesken investitsiialyq jobalar bastaýǵa kelisim jasaldy. Osy áriptestik negizinde tiisti jumystar atqarylýda. Óńirlik bailanystardy kúsheitý maqsatyndaǵy jumystar jalǵasady.
