Túrkistan oblysynyń ákimi Ómirzaq Shókeev aimaq turǵyndaryna úndeý jariialady. Aimaqta koronavirýs indetin juqtyrǵan 5 azamattyń tirkelýin aitqan oblys basshysy «COVID-19» virýsynyń taralýyna bailanysty qaýipsizdik sharalary kúsheitilgenin atap ótti, dep habarlaidy "Ult aqparat".
Óńir basshysy virýstyń taralýyn boldyrmaý maqsatynda oblys aýmaǵynda barlyq azamattar meditsinalyq betperde kiip júrýi kerektigin jetkizdi. Dúkender men qoǵamdyq oryndarda betperdesiz júrýge tyiym salynatynyn eskertti. Onda arnaiy zalalsyzdandyrý quraldary ornatylyp, turǵyndar úiden tek qana azyq-túlik pen dári-dármek alýǵa nemese jumysqa barý úshin shyǵýy kerektigi eskertildi. Otbasylyq merekeler men toi-jiyndardy ótkizýge qatań tyiym salynady.
«Epidemiolog mamandar tarapynan búgin tirkelgen aýrý oshaqtarynda zalalsyzdandyrý, bailanysta bolǵandardy tabý jáne oqshaýlaý boiynsha epidemiiaǵa qarsy is-sharalar uiymdastyryldy. Infektsiia tabylǵan Ábdihalyq aýyly men Jetisai qalasyndaǵy móltekaýdanda karantin jariialandy. Jetisai aýdanyna dezinfektsiia, densaýlyq saqtaý, áleýmettik qorǵaý salasynan arnaiy mamandardan qurylǵan mobildi top jasaqtap, jiberildi», - dedi Ómirzaq Shókeev.
Aimaq basshysy sondai-aq, qosymsha kómek retinde meditsinalyq jabdyqtar men kólikter daiyn ekenin aitty. Aýdanda infektsiia oshaǵy men qoǵamdyq oryndarda aýqymdy dezinfektsiia jumystary júrgiziletinin málimdedi. Indettiń taralý qaýpi joǵary bolǵandyqtan, oblys ákimi turǵyndardy tótenshe jaǵdaiǵa bailanysty qabyldanǵan sharalarǵa túsinistikpen qarap, tiisti tártiptik sharalardy saqtaýǵa, dárigerlerdiń nusqaýlyqtaryn buljytpai oryndaýǵa shaqyrdy.
«Ózge aýdandardan infektsionist jáne reanimotologtardan quralǵan 6 brigada Jetisaiǵa joldandy. Oblystyń Bas infektsionist dárigeri aýdanda osy sharalarǵa basshylyq etedi. Kerekti tósek-oryndar, gospitaldar tolyq daiyn. Oblys ákiminiń tapsyrmasymen, politsiia, Tótenshe jaǵdai departamenti, Ulttyq qaýipsizdik komiteti, prokýratýra, densaýlyq saqtaý salasymen birlese otyryp, shuǵyl túrde karantin jariialanǵan eldi mekender shekarasyna blok beketter qoiylýda. Tótenshe jaǵdai rejimin buzǵan azamattar zań aiasynda jaýapqa tartylady.
Ómirzaq Shókeev sondai-aq, turǵyndardy áleýmettik jelilerdi sharlaǵan ártúrli aqparattarǵa senbei, tek memlekettik organdar taratqan resmi málimettermen ǵana tanysýǵa shaqyrdy.
«Qurmetti jerlester! Dál qazir búkil álem qiyn kezeńde tur. Alaida, biz bul qiyn-qystaý ýaqyttan da birlik pen yntymaqtyń arqasynda aman-esen ótemiz dep senemin! Qazirgi tańda bizge tynyshtyq kerek, jalǵan aqparattarǵa senbeńizder. Resmi aqparatqa ǵana senińizder. Biz kúndelikti jaǵdaidy qatań baqylaýda ustap otyrmyz»,-dedi Ómirzaq Estaiuly óz úndeýinde.
