Túrkistan oblysy Báidibek aýdanyndaǵy Jambyl aýylyna gaz berildi, dep habarlaidy "Ult aqparat" oblys ákiminiń baspasóz qyzmetine silteme jasap.
Saltanatty sharaǵa arnaiy qatysqan aýdan ákimi Baqytbek Tanagózov jambyldyq turǵyndardyń qýanyshymen bólisti.
«Táýelsizdik týyn tikken jyldardan beri elimizde, onyń ishinde bizdiń aýdanda kóptegen aýqymdy jumystar qolǵa alynyp, el igiligine berilip jatyr. Sonyń bir parasy búgin Jambyl aýylynda júzege asty. Aýylǵa kógildir otyn berilip jatyr. Bul - Táýelsizdik tartýy», - dedi ol.
Kógildir otynǵa qol jetkizgen Jambyl aýylynyń turǵyndary endi kómir tasyp, kúl shyǵarmaityn boldy dep, júrekjardy tilegin jetkizgen aýdannyń qurmetti azamaty, eńbek ardageri Ábdihalyq Aǵabekov el turǵyndary atynan alǵysy men rizashylyǵyn bildirdi.
Jambyl aýyly buǵan deiin gazdandyrylmaǵan bolatyn. Endi eldi meken turǵyndaryn kógildir otynmen qamtamasyz etýge qatysty týyndaǵan máseleler tolyǵymen sheshimin taýyp otyr.
Aita keterlik jait, aýdanda 2015 jyly «Beineý-Shymkent» magistraldy gaz qubyrynyń qurylysy júrgizilip, qarasha aiynda kógildir otynnyń alaýy jaǵylyp, aýdan ortalyǵyna gaz berilgen bolatyn. Oblys qazynasynan arnaiy qarjy bólinip, 2017-2018 jyldar aralyǵynda aýdandaǵy 8 eldi mekenge gaz qubyry tartyldy. 8 eldi mekenniń 3-eýi - Jambyl aýyldyq okrýgine qarasty aýyldar. Qazirgi tańda gaz okrýg ortalyǵyna berilse, qalǵan 2 eldi mekende jaqyn kúnde kezek-kezeńimen qosylǵaly otyr.
Sonymen qatar, qazirgi tańda aýdandaǵy 7 eldi mekende gaz qubyrynyń qurylysy júrip jatyr.
