تٷركٸستان وبلىسى بەيدٸبەك اۋدانىنداعى جامبىل اۋىلىنا گاز بەرٸلدٸ, دەپ حابارلايدى "ۇلت اقپارات" وبلىس ەكٸمٸنٸڭ باسپاسٶز قىزمەتٸنە سٸلتەمە جاساپ.
سالتاناتتى شاراعا ارنايى قاتىسقان اۋدان ەكٸمٸ باقىتبەك تاناگٶزوۆ جامبىلدىق تۇرعىنداردىڭ قۋانىشىمەن بٶلٸستٸ.
«تەۋەلسٸزدٸك تۋىن تٸككەن جىلداردان بەرٸ ەلٸمٸزدە, ونىڭ ٸشٸندە بٸزدٸڭ اۋداندا كٶپتەگەن اۋقىمدى جۇمىستار قولعا الىنىپ, ەل يگٸلٸگٸنە بەرٸلٸپ جاتىر. سونىڭ بٸر پاراسى بٷگٸن جامبىل اۋىلىندا جٷزەگە استى. اۋىلعا كٶگٸلدٸر وتىن بەرٸلٸپ جاتىر. بۇل - تەۋەلسٸزدٸك تارتۋى», - دەدٸ ول.
كٶگٸلدٸر وتىنعا قول جەتكٸزگەن جامبىل اۋىلىنىڭ تۇرعىندارى ەندٸ كٶمٸر تاسىپ, كٷل شىعارمايتىن بولدى دەپ, جٷرەكجاردى تٸلەگٸن جەتكٸزگەن اۋداننىڭ قۇرمەتتٸ ازاماتى, ەڭبەك ارداگەرٸ ەبدٸحالىق اعابەكوۆ ەل تۇرعىندارى اتىنان العىسى مەن ريزاشىلىعىن بٸلدٸردٸ.
جامبىل اۋىلى بۇعان دەيٸن گازداندىرىلماعان بولاتىن. ەندٸ ەلدٸ مەكەن تۇرعىندارىن كٶگٸلدٸر وتىنمەن قامتاماسىز ەتۋگە قاتىستى تۋىنداعان مەسەلەلەر تولىعىمەن شەشٸمٸن تاۋىپ وتىر.
ايتا كەتەرلٸك جايت, اۋداندا 2015 جىلى «بەينەۋ-شىمكەنت» ماگيسترالدى گاز قۇبىرىنىڭ قۇرىلىسى جٷرگٸزٸلٸپ, قاراشا ايىندا كٶگٸلدٸر وتىننىڭ الاۋى جاعىلىپ, اۋدان ورتالىعىنا گاز بەرٸلگەن بولاتىن. وبلىس قازىناسىنان ارنايى قارجى بٶلٸنٸپ, 2017-2018 جىلدار ارالىعىندا اۋدانداعى 8 ەلدٸ مەكەنگە گاز قۇبىرى تارتىلدى. 8 ەلدٸ مەكەننٸڭ 3-ەۋٸ - جامبىل اۋىلدىق وكرۋگٸنە قاراستى اۋىلدار. قازٸرگٸ تاڭدا گاز وكرۋگ ورتالىعىنا بەرٸلسە, قالعان 2 ەلدٸ مەكەندە جاقىن كٷندە كەزەك-كەزەڭٸمەن قوسىلعالى وتىر.
سونىمەن قاتار, قازٸرگٸ تاڭدا اۋدانداعى 7 ەلدٸ مەكەندە گاز قۇبىرىنىڭ قۇرىلىسى جٷرٸپ جاتىر.
