Foto: QR TJM baspasóz qyzmeti
Qazirgi ýaqytta Túrkistan oblysynyń bes eldi mekeninde, atap aitqanda Báidibek aýdanynda Shaian men Shaqpaq, Saýran aýdanynda Shaǵa, Sozaq aýdanynyń Sholaqqorǵan aýyldarynda jáne Arys qalasynda sý burý jumystary júrgizilip jatyr, dep habarlaidy QR Tótenshe jaǵdai ministrliginiń baspasóz qyzmeti.
TJM jáne jergilikti atqarýshy organdardyń kúshterimen úilerdi sý basýǵa jol bermeý maqsatynda 13 000 birlik qum salynǵan qap tóselgen.
Jumys júrgizýge TJM, jergilikti atqarýshy organdar, Qorǵanys ministrliginiń kúshteri men quraldarynan 430-dan astam adam, 70-ke jýyq tehnika, 43 motopompa jumyldyrylǵan.
"TJD kúshimen Kentaý qalasyndaǵy Qarnaq aýylynyń, Saýran, Báidibek aýdandarynyń sý basqan aýla aýmaǵynan 204 adam, onyń ishinde 111 bala evakýatsiialandy, 201 usaq mal qaýipsiz jerge aidaldy. Jergilikti atqarýshy organdar halyqty ýaqytsha ornalastyrý úshin Saýran aýdanynda 4 evakýatsiialaý pýnktin daiyndady.
Oblystyq jáne respýblikalyq jedel shtabtar qyzmet kórsetip jatyr. Olardyń bazasynda «Jedel jeli» telefony ashyldy" - delingen habarlamada.
"Qazgidromet" RMK derekteri boiynsha 3 aqpanda oblystyń basym bóliginde jaýyn-shashyn (jańbyr, qar), sondai-aq temperatýralyq fonnyń joǵarylaýy, qardyń belsendi erýi, erigen jáne eńis aǵynynyń qalyptasýy, muz qubylystarynyń álsireýi jáne ózenderdegi sý deńgeiiniń kóterilýi kútilip otyr.
